సమఉజ్జీల సమరం కాకపోయినా.. చివరి వరకు ఆసక్తికరంగా సాగిన మ్యాచ్లో ఆస్ర్టేలియా పైచేయి సాధించింది. డేవిడ్ వార్నర్ (147 బంతుల్లో 14 ఫోర్లు, 5 సిక్సర్లతో 166) సూపర్ సెంచరీతో భారీ స్కోరు సాధించిన కంగారూలు.. సంచలనాల బంగ్లాదేశ్కు చెక్ పెట్టారు. ఫలితంగా ఐదో విజయంతో సెమీస్ బెర్త్కు మరింత చేరువయ్యారు. తనదైన రోజున మేటి జట్లను సైతం మట్టి కరిపించిన బంగ్లా పులులు.. ఈ మ్యాచ్లోనూ ఆసీస్కు దడపుట్టించారు. ముష్ఫికర్(97 బంతుల్లో 9 ఫోర్లు, 1 సిక్స్తో 102 నాటౌట్) స్ఫూర్తిదాయక ఇన్నింగ్స్ తో ఆశలు రేకెత్తించినా.. కొండంత లక్ష్యాన్ని కరిగించలేకపోయాడు. ఓవరాల్గా ఆసీస్ పదునైన బౌలింగ్కు సరితూగలేకపోయినా పోరాటంతో మెప్పించిన బంగ్లా.. మూడో ఓటమితో సెమీస్ అవకాశాలను క్లిష్టం చేసుకుంది.
నాటింగ్హామ్: వరల్డ్కప్లో ఆస్ర్టేలియా మరోసారి ఆధిపత్యం చూపెట్టింది. దీంతో గురువారం జరిగిన లీగ్ మ్యాచ్లో ఫించ్సేన 48 పరుగుల తేడాతో బంగ్లాదేశ్పై విజయం సాధించింది. టాస్ గెలిచి బ్యాటింగ్కు దిగిన ఆసీస్ 50 ఓవర్లలో 5 వికెట్లకు 381 పరుగులు చేసింది. వార్నర్కు తోడు ఖవాజ (72 బంతుల్లో 10 ఫోర్లతో 89), ఫించ్ (51 బంతుల్లో 5 ఫోర్లు, 2 సిక్సర్లతో 53) చెలరేగారు. తర్వాత బంగ్లాదేశ్50 ఓవర్లలో 8 వికెట్లకు 333 పరుగులకే పరిమితమైంది. వన్డేల్లో బంగ్లాకు ఇదే అత్యధిక స్కోరు. ముష్ఫికర్కు తోడుగా మహ్మదుల్లా (50 బంతుల్లో 5 ఫోర్లు, 3 సిక్సర్లతో 69), తమీమ్ (74 బంతుల్లో 6 ఫోర్లతో 62) రాణించారు. వార్నర్కు ‘మ్యాన్ ఆఫ్ద మ్యాచ్’ లభించింది.
ముష్ఫికర్ సెంచరీ
భారీ టార్గెట్ ఛేజింగ్లో బంగ్లా టాప్ ఆర్డర్ నిలకడగానే ఆడింది. ఓపెనర్లలో సౌమ్య సర్కార్ (10) రనౌట్మినహా.. తమీమ్, గత మ్యాచ్ హీరో షకీబ్(41) ఇన్నింగ్స్ను తొందరగానే గాడిలో పెట్టారు. ఆసీస్ పేస్ అటాక్ను దీటుగా ఎదుర్కొంటూ తొలి పవర్ప్లేలో 53/1 స్కోరు సాధించిపెట్టారు. తర్వాత అడపాదడపా ఫోర్లు కొడుతూ జట్టు స్కోరును 100కు చేర్చారు. రెండో వికెట్కు 79 పరుగులు జోడించాకా షకీబ్ను స్టోయినిస్ పెవిలియన్కు పంపాడు. తమీమ్ కూడా రనౌట్నుంచి గట్టెక్కి65 బంతుల్లో హాఫ్ సెంచరీ పూర్తి చేశాడు.102/2 స్కోరు వద్ద వచ్చిన ముష్ఫికర్.. తమీమ్కు మంచి సహకారాన్ని ఇచ్చాడు. జంపా బౌలింగ్లో భారీ సిక్సర్తో టచ్లోకి వచ్చాడు. కానీ తమీమ్25వ ఓవర్లో ఔట్కావడంతో బంగ్లా స్కోరు144/3 కి చేరింది. మూడో వికెట్కు 42 పరుగుల భాగస్వామ్యం ముగిసింది.
లిటన్ దాస్ (20) కుదురుకోవడానికి టైమ్ తీసుకున్నా.. ఎక్కువసేపు వికెట్ కాపాడుకోలేకపోయాడు. మూడు ఫోర్లు బాది జంపా బౌలింగ్లో ఔట్కావడంతో నాలుగో వికెట్కు 31 రన్స్కు తెరపడింది. ఓవరాల్గా 30 ఓవర్లు ముగిసేసరికి బంగ్లా 177/4తో ఎదురీత మొదలుపెట్టింది. ముష్ఫికర్కు జత అయిన మహ్మదుల్లా ఇన్నింగ్స్లో వేగం పెంచాడు. జంపాను లక్ష్యంగా చేసుకుని చకచకా బౌండరీలు, భారీ సిక్సర్లు కొడుతూ రన్రేట్ను పెంచాడు. దాదాపు 16 ఓవర్ల పాటు ఈ ఇద్దరు జోరు చూపడంతో ఇన్నింగ్స్ సాఫీగా ముందుకెళ్లింది. అయితే 46వ ఓవర్లో కూల్టర్నైల్ (2/58) రెండు బంతుల వ్యవధిలో మహ్మదుల్లా, షబ్బీర్(0)ను ఔట్ చేయడంతో పరుగుల వేటలో బంగ్లా వెనుకబడింది. చివరకు 12 బంతుల్లో 60 పరుగులు చేయాల్సిన దశలో మెహిది హసన్ (6) కూడా ఔటయ్యాడు. అయితే రెండో ఎండ్లో ఉన్న ముష్ఫికర్ సెంచరీ పూర్తి చేసినా.. లక్ష్యం పెరిగిపోవడంతో ఓటమి తప్పలేదు.
కుమ్మేసిన వార్నర్..
తనలో ఉన్న సహజమైన దూకుడుతో భారీ హిట్టింగ్ చేసిన వార్నర్ బంగ్లా బౌలింగ్ను ఊచకోత కోశాడు. 12 పరుగుల వద్ద బ్యాక్వర్డ్ పాయింట్లో షబ్బీర్ క్యాచ్ వదిలేయడంతో గట్టెక్కిన ఈ లెఫ్టాండర్ మ్యాచ్ మొత్తంలో స్క్వేర్ లెగ్, లాంగాన్, లాంగాఫ్, మిడ్వికెట్లో ఐదు టవరింగ్ సిక్సర్లు బాదాడు. రెండోఎండ్లో ఫించ్ కూడా రిస్క్లేకుండా ఆడటంతో తొలి 10 ఓవర్లలో ఆసీస్ 53 రన్స్ చేసింది. జోరు కొనసాగించిన వార్నర్ 55 బంతుల్లోనే హాఫ్ సెంచరీ అందుకోగా… తానేమీ తక్కువ కాదన్నట్లు16వ ఓవర్లో ఫోర్, సిక్స్కొట్టిన ఫించ్ కూడా 47 బంతుల్లో ఫిఫ్టీ మార్క్ను సాధించాడు. ఈ ఇద్దరి దూకుడుతో కంగారూలు 20 ఓవర్లలో 117 రన్స్ చేసి మెరుగైన స్థితిలో నిలిచారు. ఇక ప్రమాదకరంగా మారుతున్న ఈ జోడీని సౌమ్య సర్కార్ (3/58) తన తొలి ఓవర్ (21వ)లోనే విడగొట్టాడు. ఎక్స్ట్రా బౌన్స్తో వేసిన ఫుల్లెంగ్త్ బంతిని ఆడబోయి ఫించ్… షార్ట్ థర్డ్మ్యాన్లో రూబెల్కు క్యాచ్ ఇచ్చాడు. ఈ దశలో వచ్చిన ఖవాజ విలువైన ఇన్నింగ్స్తో ఆకట్టుకున్నాడు. వార్నర్ దూకుడును చూపెట్టినా.. తాను మాత్రం నిలకడగా ఆడుతూ వీలైనప్పుడల్లా బంతిని రోప్దాటించాడు. వికెట్లు తీయలేక చేష్టలుడిగిన బంగ్లా బౌలర్లను వీళ్లిద్దరు మరింత విసిగించారు.
99 రన్స్ వద్ద షకీబ్ బంతిని స్క్వేర్ లెగ్లోకి పంపిన వార్నర్కెరీర్లో 16వ సెంచరీ (109 బాల్స్) పూర్తి చేశాడు. ముస్తాఫిజుర్ (1/69) బాల్ను రివర్స్ స్వింగ్ చేసినా.. ఈ జంట ముందు తేలిపోయాడు. దీంతో ఖవాజ 50 బంతుల్లో 50 మార్క్ను చేరాడు. 41వ ఓవర్ నుంచి ఈ ఇద్దరు జోరు పెంచడంతో పరుగులు వేగంగా వచ్చాయి. ఖవాజ ఐదు ఫోర్లు బాదితే.. వార్నర్ మాత్రం రెండు సిక్స్లు, నాలుగు ఫోర్లతో రెచ్చిపోయాడు. ఇదే జోరులో సౌమ్య (45వ ఓవర్) వేసిన బౌన్సర్ను టచ్చేసి షార్ట్ థర్డ్మ్యాన్లో రూబెల్కు క్యాచ్ ఇచ్చి వార్నర్ఔటయ్యాడు. ఈ ఇద్దరి మధ్య రెండో వికెట్కు 192 పరుగులు జతయ్యాయి. 41 నుంచి 45 ఓవర్ల మధ్య వికెట్ నష్టానికి 58 రన్స్ సమకూరడంతో ఆసీస్ స్కోరు 300 దాటింది. భారీ పునాదిపై మ్యాక్స్వెల్ (10 బంతుల్లో 2 ఫోర్లు, 3 సిక్సర్లతో 32) వీరవిహారం చేశాడు. కానీ 47వ ఓవర్రెండో బంతికి అనూహ్యంగా రనౌట్అయ్యాడు. తర్వాతి ఐదు బంతుల్లో ఖవాజ, స్మిత్ (1) వెనుదిరిగారు. చివర్లో వర్షం కొద్దిగా అంతరాయం కలిగించినా… స్టోయినిస్ (17 నాటౌట్) మెరుగ్గా ఆడటంతో ఆసీస్భారీ స్కోరు సాధ్యమైంది.
