- సింగరేణిని మరింత విస్తరింపజేస్తం: బలరామ్
- ఆస్ట్రేలియా సహకారం అందిస్తది
- రానున్న ఐదేండ్లలో లక్ష్యాన్ని చేరుకుంటామన్న సీఎండీ
హైదరాబాద్, వెలుగు: సింగరేణిలో లేటెస్ట్ మైనింగ్ టెక్నాలజీ వాడకాన్ని పెంచి గణనీయమైన వృద్ధి సాధిస్తామని సీఎండీ బలరామ్ తెలిపారు. బొగ్గు ఉత్పత్తితో పాటు వ్యాపార విస్తరణ చర్యల్లో భాగంగా థర్మల్, సోలార్ రంగాల్లోకి విజయవంతంగా అడుగుపెట్టినట్టు వివరించారు. ప్రస్తుతం సంస్థ వినియోగిస్తున్న టెక్నాలజీ, ఈ ఏడాది సాధించిన రికార్డు ఉత్పత్తి, ట్రాన్స్పోర్ట్, టర్నోవర్, సంస్థ వృద్ధి రేటు వివరాలను గురువారం హైదరాబాద్లోని సింగరేణి భవన్లో ఆయన మీడియాకు వెల్లడించారు.
సింగరేణి సంస్థ వచ్చే ఐదేండ్లలో పెట్టుకున్న 100 మిలియన్ టన్నుల కోల్ ప్రొడక్షన్ టార్గెట్ సాధించేందుకు లేటెస్ట్ మైనింగ్ టెక్నాలజీని ఉపయోగించనున్నట్టు తెలిపారు. టెక్నాలజీ కోసం ఆస్ట్రేలియా సహకారం అందించనున్నదని వివరించారు. ఆస్ట్రేలియా ట్రేడ్ ఇన్వెస్ట్మెంట్ కమిషనర్ డెనిస్ ఈటెన్తో భేటీ అయినట్లు చెప్పారు.
‘‘వ్యాపార విస్తరణలో భాగంగా ఇతర రంగాల్లోని అవకాశాలను పూర్తిగా పరిశీలిస్తున్నం. గతంలో ఆస్ట్రేలియాకు చెందిన సింటార్స్ తదితర సంస్థలతో మైనింగ్, రక్షణ, సాంకేతిక విషయాల్లో సేవలు స్వీకరించాం. సంస్థలో అమలవుతున్న టెక్నాలజీని స్వయంగా పరిశీలించేందుకు నవంబర్లో ఆస్ట్రేలియా టీమ్ సింగరేణి ప్రాంతానికి రానున్నది’’అని తెలిపారు. మైనింగ్ సెక్టార్లో కొత్త టెక్నాలజీపై ఆస్ట్రేలియా నిర్వహిస్తున్న ట్రైనింగ్ క్లాసులను సద్వినియోగం చేసుకోవాలని డెనిస్ ఈటెన్ కోరారు.
