- నిందితుడిని అరెస్ట్ చేసిన టాస్క్ఫోర్స్
బషీర్బాగ్, వెలుగు: సిటీలో చిన్నపిల్లలు, వృద్ధులు, దివ్యాంగులు, ఒంటరి మహిళలతో భిక్షాటన చేయిస్తూ.. వచ్చిన డబ్బులతో జల్సాలు చేస్తున్న ఓ యువకుడిని వెస్ట్ జోన్ టాస్క్ ఫోర్స్ పోలీసులు అరెస్ట్ చేశారు. టాస్క్ ఫోర్స్ డీసీపీ రాధాకిషన్ రావు తెలిపిన ప్రకారం... కర్ణాటకలోని గుల్బర్గాకు చెందిన అనిల్ పవార్ (28) సిటీకి వచ్చి ఫతేనగర్లో ఉంటున్నాడు. ఈజీ మనీ కోసం చిన్నారులు , దివ్యాంగులు, వృద్ధులు , ఒంటరి మహిళలను ఎంగేజ్ చేసుకొని పలు చౌరస్తాల్లో వారితో భిక్షాటన చేయిస్తున్నాడు. ఇది పోలీసులకు తెలియడంతో వెస్ట్ జోన్ టాస్క్ ఫోర్స్ పోలీసులు సయోధ్య , స్మైల్ ప్రాజెక్ట్ ఎన్జీవోల ఆధ్వర్యంలో కేబీఆర్ పార్క్ , జూబ్లీహిల్స్ చెక్పోస్ట్ వద్ద భిక్షాటన చేస్తున్న 23 మంది అదుపులోకి తీసుకొని విచారించారు.
అనిల్ పవార్ భిక్షాటన చేయిస్తూ ప్రతిరోజు రూ. 4,500 నుంచి రూ. 6 వేల వరకు తమ నుంచి తీసుకుంటున్నాడని తెలిపారు. రోజు కూలీగా ఒక్కొక్కరికి రూ. 200 చొప్పున ఇస్తున్నాడని తమ గోడు చెప్పుకున్నారు. దీంతో అనిల్ పవార్ను అదుపులోకి తీసుకొని, అతని వద్ద ఉన్న రెండు బైక్లను సీజ్ చేశారు. భిక్షాటన చేస్తున్న వారిని ఎన్జీవో హోమ్ కు తరలించారు. నిందితుడిపై బెగ్గింగ్ యాక్ట్ కింద కేసు నమోదు చేసి జూబ్లీహిల్స్ పోలీసులకు అప్పగించారు. ఈ ఆపరేషన్లో ఎన్జీవో ఇన్చార్జిలు లక్ష్మి కవిత , కె స్వప్న, బి సుజాత రాణి పాల్గొన్నారు.
