న్యూఢిల్లీ: ఆహార వస్తువుల ధరలు ఎక్కువగానే ఉన్నా, తయారు చేసిన వస్తువులు, ఇంధనం, కరెంటు రేట్లు తగ్గడంతో ఈ జనవరిలో టోకు ధరల ఆధారిత ఇన్ఫ్లేషన్ రెండేళ్ల కనిష్ట స్థాయి 3.85 శాతానికి తగ్గింది. టోకు ధరల సూచీ (డబ్ల్యూపీఐ) ఆధారిత ఇన్ఫ్లేషన్ రేటు తగ్గడం ఇది వరుసగా తొమ్మిదో నెల. డబ్ల్యూపీఐ ఇన్ఫ్లేషన్ జనవరిలో 4.73 శాతంగా ఉండగా, కిందటి ఏడాది ఫిబ్రవరిలో 13.43 శాతంగా ఉంది. ముడి పెట్రోలియం & సహజ వాయువు, ఆహారేతర వస్తువులు, ఆహార ప్రొడక్టులు, ఖనిజాలు, కంప్యూటర్, ఎలక్ట్రానిక్ & ఆప్టికల్ ప్రొడక్టులు, కెమికల్ ప్రొడక్టులు, ఎలక్ట్రికల్ పరికరాలు, వెహికల్స్, ట్రైలర్ల ధరలు తగ్గాయని కేంద్ర వాణిజ్య పరిశ్రమ మంత్రిత్వ శాఖ మంగళవారం తెలిపింది. 2021 జనవరి తరువాత డబ్ల్యూపీఐ ఇన్ఫ్లేషన్3.85 శాతానికి తగ్గడం ఇదే మొదటిసారి. 2021 జనవరిలో ఇది 2.51 శాతం రికార్డయింది. అనుకూలమైన బేస్ ఎఫెక్ట్ కారణంగా ధరల్లో బాగా తగ్గుదల కనిపిస్తోందని ఎకనమిస్టులు అంటున్నారు.
కొద్దిగా తగ్గిన యూఎస్ ఇన్ఫ్లేషన్
మార్కెట్ అంచనాలకు తగినట్లుగానే ఈ ఏడాది ఫిబ్రవరి నెలలో యూఎస్ ఇన్ఫ్లేషన్ రేటు 6 శాతానికి తగ్గింది. అంతకు ముందు నెల అంటే జనవరి 2023 లో ఈ ఇన్ఫ్లేషన్ రేటు 6.4 శాతంగా రికార్డయింది. యాన్యువల్ ఇన్ఫ్లేషన్ రేటు తగ్గడం ఇది వరసగా ఎనిమిదో నెల. ఇన్ఫ్లేషన్ గణాంకాలను యూఎస్ లేబర్ డిపార్ట్మెంట్ రిలీజ్ చేసింది. అంచనాలకు తగినట్లుగానే ఇన్ఫ్లేషన్ రేటు ఉండటంతో అమెరికా మార్కెట్లు ట్రేడింగ్ ప్రారంభంలోనే బాగా పుంజుకున్నాయి.
