ఆదివారం ( సెప్టెంబర్ 7 ) రాత్రి ప్రపంచవ్యాప్తంగా చంద్రగ్రహణం ఏర్పడనున్న సంగతి తెలిసిందే. చంద్రగ్రహణం కారణంగా ఇవాళ దేశవ్యాప్తంగా ఆలయాలు మూతపడ్డాయి. సోమవారం ఉదయం ఆలయాలు తిరిగి తెరుచుకోనున్నాయి. అయితే.. దేశవ్యాప్తంగా ఆలయాలు ముసేసినా.. ఏపీలోని శ్రీకాళహస్తి ఆలయం మాత్రం తెరిచే ఉంటుంది. గ్రహణంలో సమయంలో భక్తులను ఆలయంలోకి అనుమతించరు కానీ.. ఆలయంలో శాంతిపూజలు నిర్వహిస్తారు. శ్రీకాళహస్తి ఆలయంతో పాటు.. ఢిల్లీలోని మరో ఆలయం కూడా గ్రహణం సమయంలో తెరిచే ఉంటుంది. ఆ ఆలయం ఏంటి..?, గ్రహణం సమయంలో తెరిచి ఉంచడానికి కారణమేంటి ఇప్పుడు తెలుసుకుందాం..
ఢిల్లీ నడిబొడ్డున ఉన్న ప్రసిద్ధ కల్కాజీ మందిర్ గ్రహణం సమయంలో కూడా తెరిచే ఉంటుంది. శతాబ్దాల చరిత్ర గల ఈ ఆలయం గ్రహగండాలకు అతీతంగా నిలుస్తోంది. ఢిల్లీలోని అత్యంత శక్తివంతమైన పీఠాలలో ఒకటిగా ప్రసిద్ధి చెందిన ఈ ఆలయంలో కాళీమాత గ్రహణం సమయంలో కూడా నిరంతరాయంగా దర్శనమిస్తుంది. ఢిల్లీలోని నెహ్రు ప్లేస్ ఎదురుగా ఉన్న కల్కాజీ మందిర్ లో గ్రహణం సమయంలో కూడా పూజలు అందుకుంటుంది కాళీమాత.
ALSO READ : చంద్రగ్రహణం ఎఫెక్ట్: కాశీ, వైష్ణోదేవీ సహా దేశంలోని ప్రముఖ ఆలయాలన్నీ క్లోజ్..!
సాధారణ రోజుల్లో కల్కాజీ మందిర్ ఉదయం 4 గంటలకు ప్రారంభమై రాత్రి 11:30 గంటల వరకు తెరిచి ఉంటుంది, ఆచార కార్యక్రమాల కోసం మధ్యాహ్నం కొద్దిసేపు విరామం ఉంటుంది. గ్రహణాల సమయంలో, ఇతర దేవాలయాల మాదిరిగా కాకుండా, దర్శనం యథావిధిగా ఉంటుంది.
తొమ్మిది గ్రహాలు, పన్నెండు రాశిచక్ర గుర్తులు ఆలయంలో దైవిక అస్తిత్వాలుగా నివసిస్తాయి, వీటిని ప్రతీకాత్మకంగా కాళీమాత పిల్లలుగా భావిస్తారు. గర్భగుడిలో వాటి ఉనికి ఆలయాన్ని గ్రహణ ప్రభావానికి గురికాకుండా చేస్తుందని ఆలయ అర్చకులు చెబుతున్నారు. గ్రహణాలకు సంబంధించిన ఏదైనా చెడు శక్తిపై కాళీమాత శక్తి ప్రబలంగా ఉంటుందని భక్తులు నమ్ముతారు.
