కాగజ్నగర్, వెలుగు: ఆసిఫాబాద్ జిల్లా చింతలమానేపల్లి మండలంలో బుధవారం పత్తి ఏరేందుకు వెళ్తూ వాహనంలో నుంచి జారి పడి ఓ యువతి చనిపోయింది. స్థానికుల కథనం ప్రకారం.. పాల్వాయినగర్ కు చెందిన దుర్గం అంకులు, మీనా దంపతుల బిడ్డ అఖిల(19) బుధవారం పత్తి ఏరడానికి తల్లి, మరికొందరు కూలీలతో కలిసి ఫోర్వీలర్(బొలెరో)లో వెళ్లింది. అందరూ వెనక కూర్చోగా అఖిల ప్రమాదవశాత్తూ అందులోంచి జారి రోడ్డుపై పడిపోయింది. తలకు బలమైన గాయాలు కావడంతో ఆమె ను అదే వెహికల్లో కౌటాలలోని హాస్పిటల్ కు తరలించారు. అయితే, అప్పటికే ఆమె చనిపోయిందని డాక్టర్ ప్రకటించారు. మృతురాలి తండ్రి అంకులు జార్ఖండ్లో ఉండడంతో ఆయన రాక కోసం వేచి చూస్తున్నారు. బుధవారం రాత్రి వరకైతే తమకు ఎలాంటి ఫిర్యాదు రాలేదని చింతలమానేపల్లి ఎస్ఐ సురేశ్ తెలిపారు.
