ప్రపంచంలోనే తొలి దివ్యాంగ ఆస్ట్రోనాట్ (వ్యోమగామి)గా జాన్ మెక్ ఫాల్ చరిత్రకెక్కారు.భవిష్యత్తులో తాము చేపట్టే రోదసీ యాత్రల కోసం ట్రైనింగ్ ఇచ్చేందుకు ఆయనను ఎంపిక చేశామని యూరోపియన్ స్పేస్ ఏజెన్సీ వెల్లడించింది. బ్రిటన్ కు చెందిన జాన్ మెక్ ఫాల్ గతంలో పారా ఒలింపిక్స్ లో అథ్లెట్గానూ పాల్గొన్నారు. దివ్యాంగులు అంతరిక్ష వాతావరణంలో ఎలా ఉండగలరు ? వారికి ఎదురయ్యే ప్రతికూలతలు ఏమిటి ? దివ్యాంగులకు సౌకర్యవంతమైన రోదసీ యాత్రను ఎలా డిజైన్ చేయాలి ? అనే అంశాలపై అధ్యయనం కోసం జాన్ మెక్ పాల్ సేవలను వినియోగించుకోనున్నారు.
పారా ఆస్ట్రోనాట్ పోస్ట్ కోసం యూరోపియన్ స్పేస్ ఏజెన్సీకి వందలాది అప్లికేషన్లు రాగా.. వాటిని జల్లెడ పట్టి చివరకు జాన్ మెక్ఫాల్ కు దివ్యాంగుల కేటగిరిలో ఆస్ట్రోనాట్గా అయ్యే అవకాశాన్ని కల్పించారు. ట్రైనింగ్ దశలో భాగంగా తొలుత జాన్ మెక్ ఫాల్ యూరోపియన్ స్పేస్ ఏజెన్సీకి చెందిన ఇంజనీర్లతో కలిసి పనిచేస్తాడు. రోదసీ యాత్రతో ముడిపడిన సాంకేతిక, నిర్వహణపరమైన అంశాలపై కొంచెం కొంచెంగా అవగాహన పెంచుకుంటాడు.
