సరిగ్గా 42 ఏండ్ల కిందట ఆకాశం నుంచి ఓ శక్తిమంతమైన సిగ్నల్ భూమి మీదకు వచ్చింది. ఆకాశం వైపు నిఘానేత్రాన్ని ఉంచి అందుకోసమే ఎదురు చూస్తున్న బిగ్ఇయర్ రేడియో టెలిస్కోపు దానిని యాంటెన్నాతో పట్టేసింది. అంత పవర్ఫుల్ సిగ్నల్ను సైంటిస్టులు అందుకోవడం అదే మొదటిసారి. దురదృష్టవశాత్తూ అదే చివరి సారి కూడా అయింది! ఈ సిగ్నల్ను ఒహాయో స్టేట్ యూనివర్సిటీకి చెందిన బిగ్ఇయర్ రేడియో టెలిస్కోపు ద్వారా అమెరికా ఆస్ట్రానమర్ జెర్రీ ఎహ్మాన్ 1977 ఆగస్టు 15న రికార్డ్ చేశారు. అప్పట్నుంచి అది మిస్టరీనే.
‘వావ్’ అనిపించిన సిగ్నల్
ఎలియన్స్ ఉనికిని కనిపెట్టాలని సైంటిస్టులు ఎప్పటి నుంచో రీసెర్చ్లు చేస్తూనే ఉన్నారు. అప్పుడప్పుడుకొందరు తాము ఎలియన్ సిగ్నళ్లను కనిపెట్టామోచ్ అంటూ ఎగిరిగంతేసినా.. అవి కచ్చితంగా అవేనని చెప్పేందుకు ఇంతవరకూ ఒక్క ఆధారం కూడా దొరకలేదు. ఇక జెర్రీ ఎహ్మాన్ వావ్ సిగ్నల్ను అందుకోగానే ఉబ్బితబ్బిబ్బయ్యారు. అప్పట్లో డిజిటల్ రూపంలో సిగ్నళ్లను భద్రపర్చే చాన్స్ లేకపోవడంతో ఆయన కంప్యూటర్ ప్రింట్ తీసుకున్నారు. లెక్కలేసి ‘వావ్’ అని రాశారు. ఆ సిగ్నల్ వివరాలు తెలుసుకుని ఇతర సైంటిస్టులు కూడా వావ్అనేశారు. ఎందుకంటే.. ఇలాంటి సిగ్నళ్లను ఎలియన్స్ మాత్రమే పంపేందుకు చాన్స్ ఉంటుందని, మనకు తెలిసిన నక్షత్రాలు, గ్రహాల నుంచి ఇలాంటి సిగ్నళ్లు వచ్చే చాన్సే లేదని వారు తేల్చేశారు. దీంతో అప్పటి నుంచి దానిని వావ్సిగ్నల్ అని పిలుస్తున్నారు.
వావ్ సిగ్నల్ సాగిటారస్ నక్షత్ర మండలం (ధనస్సు రాశి) నుంచి వచ్చిందని ఎహ్మాన్ వెల్లడించారు. అయితే, భూమి తిరుగుతూ ఉండటం వల్ల అది బిగ్ఇయర్ టెలిస్కోపు యాంటెన్నాకు 72 సెకన్లపాటు మాత్రమే చిక్కిందని చెప్పారు. ఆ సిగ్నల్ కంప్యూటర్ స్క్రీన్పై నిమిషంపైగా మెరిసి, మాయమైందన్నారు. విశ్వంలోని ఇతర నక్షత్రాల నుంచి వచ్చే కాంతి ఫ్రీక్వెన్సీ 1 నుంచి 10 గిగాహెర్జ్ మధ్యలో ఉంటేనే మనకు స్పష్టంగా కనిపిస్తుంది. వావ్ సిగ్నల్సరిగ్గా 1.42 గిగాహెర్జ్ ఫ్రీక్వెన్సీతో వచ్చినట్లు తేలింది. దీంతో ఇది ఎలియన్ సిగ్నలే అని చాలామంది తేల్చేశారు. మరికొందరేమో అది విశ్వంలోని ఏదో ఒక కాంతి రేఖ అయి ఉండొచ్చు కదా? అని కొట్టిపారేశారు. అయితే, వావ్ సిగ్నల్ను కనుగొన్న కొన్నేండ్లకు బిగ్ ఇయర్ రేడియో టెలిస్కోపును ఆపేశారు.
