ఊహ తెలియకముందే కొన్ని లక్షల మంది అభిమానాన్ని సంపాదించుకుంది. బుడి బుడి అడుగులు వేస్తున్న వయసులోనే ప్రపంచవ్యాప్తంగా ఫేమస్ అయ్యింది అనయ కంధాల్. ఆమె చిరునవ్వుకు యూట్యూబ్లో కోట్లమంది ఫ్యాన్స్ ఉన్నారు. అనయ అల్లరి చేసే వీడియోలకు లెక్కలేనన్ని వ్యూస్ వస్తుంటాయి. సరిగ్గా మాటలు రాని వయసులోనే సోషల్ మీడియాలో సెలబ్రిటీ అయిపోయింది.
అనయ కంధాల్ 2021 జూన్ 21న ఉత్తరప్రదేశ్లోని లక్నోలో పుట్టింది. నాలుగు సంవత్సరాల వయసులోనే యూట్యూబ్ స్టార్‌‌గా భారతదేశంలోనే కాదు ప్రపంచవ్యాప్తంగా గుర్తింపు తెచ్చుకుంది. అనయ యూట్యూబ్ ప్రయాణం ఆమెకు రెండేళ్లు ఉన్నప్పుడే మొదలైంది. ఆమె తల్లిదండ్రులు ప్రీతిరానా, జోనీ. అనయ చిన్నప్పటినుంచే బాగా యాక్టివ్గా ఉండేది. అల్లరి చేసేది. అందుకే వాళ్లు ఎప్పుడూ తమ గారాల పట్టి వీడియోలు తీస్తుండేవాళ్లు. ఆ ఆనందకరమైన క్షణాలను ప్రపంచంతో పంచుకోవాలని ఆ వీడియోలను యూట్యూబ్ చానెల్లో అప్లోడ్ చేశారు. ఆ వీడియోలు అందరికీ నచ్చాయి. దాంతో లక్షల్లో వ్యూస్ వచ్చాయి. అంతే అప్పటినుంచి రెగ్యులర్గా వీడియోలు చేయడం మొదలుపెట్టారు.
వాస్తవానికి అనయ తల్లిదండ్రులు ఆమెని యూట్యూబర్ని చేయాలి అనుకోలేదు. కానీ.. అప్పుడప్పుడు చూసుకోవడానికి వాళ్ల ఫ్యామిలీ మెమొరీస్ని డాక్యుమెంట్ చేసుకోవాలి అనుకున్నారు. ఆ ఉద్దేశంతోనే చానెల్ పెట్టారు. ఈ విషయం వాళ్ల చానెల్ ‘‘అనయ కంధాల్” డిస్క్రిప్షన్ చూస్తే అర్థమైపోతుంది. అయితే.. వాళ్లు అలా అనుకోకుండా చేసిన ప్రయత్నమే అనయని యూట్యూబ్ స్టార్ని చేసింది. పైగా అప్పట్లో వాళ్ల చానెల్లో కంటెంట్ కోసం పెద్దగా ప్లానింగ్ కూడా చేసేవాళ్లు కాదు. ఇప్పుడు మాత్రం కంటెంట్ క్రియేషన్లో చాలా జాగ్రత్తలు తీసుకుంటున్నారు. అన్ని వయసుల వాళ్లకు నచ్చే విధంగా ప్లాన్ చేస్తున్నారు.
అప్పుడప్పుడు అనయ అమ్మమ్మ కూడా వీడియోల్లో కనిపిస్తుంటుంది. రెగ్యులర్గా డైలీ వ్లాగ్స్తోపాటు అనయ చేసే చిన్న చిన్న సాహసాలు, పుట్టినరోజు వేడుకలు, ఎవరికీ ఇబ్బంది కలిగించని ప్రాంక్స్, కుటుంబంతో గడిపిన మధురమైన క్షణాలను యూట్యూబ్లో అప్లోడ్ చేస్తుంటారు. అనయ ‘‘మాయా స్టార్’’ను కనుగొనడం, వాళ్ల అమ్మతో కలిసి ఇంట్లో దెయ్యం ఉందని నాన్నని ప్రాంక్ చేయడం లాంటి వీడియోలు ఆమెని పిల్లలు, కుటుంబాలకు దగ్గరచేశాయి. మరో ప్రత్యేకత ఏంటంటే.. వీడియో క్వాలిటీ, ఎడిటింగ్ చాలా బాగుంటాయి. వాటి వల్ల కూడా వ్యూస్ పెరుగుతున్నాయి.
ఇలా మొదలైంది
అనయ యూట్యూబ్ ప్రయాణం రెండేండ్ల క్రితం మొదలైంది. ‘‘మై ఫస్ట్ వ్లాగ్”పేరుతో మొదటి వీడియో అప్లోడ్ చేశారు. అందులో వాళ్ల అమ్మ కొన్ని మాటలు చెప్తే అనయ వాటిని రిపీట్ చేసింది. ఆ వీడియోకు పెద్దగా వ్యూస్ రాలేదు. దాంతో కొన్ని నెలలపాటు మళ్లీ పెద్ద వీడియోలు చేయలేదు. కేవలం షార్ట్ వీడియోలు మాత్రమే అప్లోడ్ చేశారు. అనుకోకుండా ఆ వీడియోలు వైరల్ అయ్యాయి. అప్పటినుంచి వెనుదిరిగి చూసుకోవాల్సిన అవసరం రాలేదు.
చేసిన ప్రతి వీడియోకు మిలియన్లలో వ్యూస్ వచ్చేవి. 2024 ఏప్రిల్లో అనయ చానల్ వారం రోజుల్లో ఎక్కువ వ్యూస్ వచ్చిన టాప్ 50 చానెళ్ల లిస్ట్‌‌లో చేరింది. 732.1 మిలియన్ వీక్లీ వ్యూస్తో ఈ రికార్డ్‌ క్రియేట్ చేసింది. ఇప్పటివరకు చానెల్‌‌‌‌కు 50 బిలియన్లకు పైగా వ్యూస్ వచ్చాయి. అనయకు ఇండియాలోనే కాదు.. ప్రపంచవ్యాప్తంగా చాలా దేశాల్లో అభిమానులు ఉన్నారు.
సబ్‌‌స్క్రయిబర్స్..
‘అనయ కంధాల్’ చానెల్ని 2016లోనే మొదలుపెట్టారు. కానీ.. వీడియోలు అప్లోడ్ చేయలేదు. అనయ పుట్టిన తర్వాత 2022లో మొదటి వీడియో అప్లోడ్ చేశారు. ప్రస్తుతం 59.6 మిలియన్ల మంది చానెల్‌‌ను సబ్‌‌స్క్రయిబ్ చేసుకున్నారు. అంటే కంటెంట్ చేయడం మొదలుపెట్టిన రెండున్నరేళ్లలోనే కోట్ల మంది ఫాలోవర్స్ వచ్చారు. చానెల్లో ఇప్పటివరకు 1 బిలియన్ వ్యూస్ దాటిన షార్ట్ వీడియోలు మూడు ఉన్నాయి. ఇక వంద మిలియన్ల వ్యూస్ వచ్చిన వీడియోలకైతే లెక్కేలేదు. అలాంటివి బోలెడు ఉన్నాయి. అంతేకాదు.. యూట్యూబ్ యాడ్ రెవెన్యూ, బ్రాండ్ ప్రమోషన్స్ ద్వారా నెలకు లక్షల్లో సంపాదిస్తోంది ఈ చిచ్చరపిడుగు.
