జనగామ, వెలుగు: జనగామ మాతా శిశు ఆరోగ్య కేంద్రం (ఎంసీహెచ్)లో డాక్టర్లు మంగళవారం ఒకే రోజు రికార్డ్ స్థాయిలో 35 డెలివరీలు చేశారు. గడిచిన 24 గంటల్లో 35 కాన్పులు చేయగా తల్లులు, పిల్లలు అందరూ ఆరోగ్యంగా ఉన్నారని హాస్పిటల్ డాక్టర్లు తెలిపారు. ఈ డెలివరీల్లో 14 నార్మల్ కాగా 21 కాన్పులు సిజేరియన్అయినట్లు చెప్పారు. ఈ కాన్పుల్లో 20 మంది మగపిల్లలు, 15 మంది ఆడపిల్లలు పుట్టారని వెల్లడించారు. 15 మంది మహిళలకు మొదటి కాన్పు జరిగిందని, వీరిలో 9 మందికి నార్మల్ డెలివరీలు, మిగతా ఆరుగురికి సిజేరియన్ అయిందని తెలిపారు. డెలివరీలు చేసిన డాక్టర్లు శోభ, రజిని, మనస్విని, సిస్టర్లు మరియమ్మ, సంగీత, ఇతర స్టాఫ్ ను హాస్పిటల్ సూపరింటెండెంట్ డాక్టర్ సుగుణాకర్ రాజు, ఆర్ఎంఓ శంకర్ నాయక్ అభినందించారు. డాక్టర్ల పనితీరుపై గర్భిణీలు, వారి బంధువులు సంతోషం వ్యక్తం చేశారు.
