వేసవి తాపం నుంచి ఉపశమనం పొందాలన్నా, శరీరంలోని మలినాలను బయటకు పంపి తక్షణ శక్తిని పొందాలన్నా ‘బూడిద గుమ్మడి’కి మించినది లేదు. పోషకాల గనిగా పిలిచే ఈ కూరగాయతో కేవలం కూరలే కాదు.. ఎంతో రుచికరమైన మజ్జిగచారు, చలువ చేసే సలాడ్, రిఫ్రెషింగ్ డ్రింక్ కూడా తయారు చేసుకోవచ్చు. ఆరోగ్యాన్ని, రుచిని అందించే బూడిద గుమ్మడి రెసిపీలు మీకోసం..
మజ్జిగచారు
కావాల్సినవి :బూడిద గుమ్మడి కాయ ముక్కలు - అరకిలోఉప్పు, నూనె - సరిపడాపచ్చి కొబ్బరి - ఒక కప్పు పెరుగు - ఒకటిన్నర కప్పు ఆవాలు, పసుపు, కారం - ఒక్కోటి అర టీస్పూన్ పచ్చిమిర్చి, ఎండు మిర్చి - రెండేసి చొప్పున నీళ్లు - రెండు కప్పులు మెంతులు - పావు టీస్పూన్ కరివేపాకు - కొంచెం
తయారీ : బూడిద గుమ్మడి కాయ ముక్కల్ని నీళ్లతో కడిగి, ఒక గిన్నెలో వేసి నీళ్లు పోయాలి. అందులో పచ్చిమిర్చి, పసుపు, కారం, ఉప్పు వేసి మూతపెట్టి పది నిమిషాలు ఉడికించాలి. పచ్చికొబ్బరి తురుమును మిక్సీజార్లో వేసి నీళ్లు పోసి మెత్తగా గ్రైండ్ చేయాలి. తర్వాత అందులో పెరుగు వేసి మరోసారి గ్రైండ్ చేయాలి. దీన్ని గుమ్మడికాయల మిశ్రమంలో పోసి కలపాలి. మరోపాన్లో నూనె వేడి చేసి ఆవాలు, మెంతులు, ఎండు మిర్చి, కరివేపాకు వేసి వేగించాలి. ఆ తాలింపును రెడీ చేసుకున్న మజ్జిగచారులో కలపాలి.
సలాడ్
కావాల్సినవి : బూడిద గుమ్మడి కాయ - అర కిలో మిరియాల పొడి - అర టీస్పూన్ ఉప్పు - సరిపడా, దానిమ్మ గింజలు - అరకప్పు పెరుగు - పావులీటరు
తయారీ : బూడిద గుమ్మడికాయను తురమాలి. ఆ తురుమును నీరు లేకుండా వడకట్టాలి. తర్వాత దాన్ని గిన్నెలో వేసి అందులో మిరియాల పొడి, ఉప్పు, దానిమ్మ గింజలు, పెరుగు వేయాలి. అవన్నీ కలిసేలా బాగా కలపాలి. అవసరమైతే.. రుచికోసం తాళింపు వేసుకోవచ్చు. ఈ సలాడ్ ఆరోగ్యానికి ఎంతో మేలు చేస్తుంది. ముఖ్యంగా ఎండాకాలంలో శరీరాన్ని చల్లబరచడానికి ఉపయోగపడుతుంది.
డ్రింక్
కావాల్సినవి : బూడిద గుమ్మడికాయ ముక్కలు - ఒక కప్పు నిమ్మరసం - ఒక టీస్పూన్ పుదీనా - కొంచెం ఉప్పు, నీళ్లు - సరిపడా
తయారీ : బూడిద గుమ్మడికాయ ముక్కల్ని మిక్సీజార్లో వేసి మెత్తగా గ్రైండ్ చేయాలి. ఆ మిశ్రమాన్ని వడకట్టి నీళ్లు సపరేట్ చేయాలి. ఆ నీళ్లలో ఉప్పు, నిమ్మరసం వేసి కలపాలి. పుదీనా చల్లాలి.
