వినాయకుడికి ఉండ్రాళ్లు అంటే బోలెడంత ఇష్టం. ఇవేకాదు బొజ్జగణపయ్యకు బోలెడు ఇష్టాలున్నాయి. అందుకే భోజనప్రియుడైన గణపయ్యకు రకరకాల నైవేద్యాలు సమర్పిస్తారు. ఆ నైవేద్యాల్లో, పాల ఉండ్రాళ్లు, ఉండ్రాళ్ల తాలింపు ... వెరైటీలను ఎలా తయారు చేయాలో తెలుసుకుందాం. .
భోజన ప్రియుడైన బొజ్జ గణపయ్యకు…ఎన్ని ఫలహారాలు పెట్టినా తక్కువే. మరి వినాయక చవితి ( 2026 సెప్టెంబర్ 14) రోజు వివిధరకాల నైవేద్యాలు పెట్టాల్సిందేగా. అందుకే ఆయనకు ఇష్టమైన, రుచికరమైన వంటలు . ఈ వినాయకచవితి పండుగకు ఇవి చేసి నైవేద్యంగా పెట్టండి.
పాల ఉండ్రాళ్లు తయారీకి కావాల్సినవి
- బియ్యప్పిండి: 80 గ్రాములు
- నీళ్లు: పావులీటర్
- నెయ్యి/ వెన్న: ఒక టేబుల్ స్పూన్
- ఉప్పు: చిటికెడు
- పాలు: అర లీటర్
- చక్కెర: 120 గ్రాములు
- కొబ్బరి తురుము: పావు కప్పు
- యాలకుల పొడి: అర టీ స్పూన్
పాల ఉండ్రాళ్లు తయారీ విధానం
బియ్యప్పిండి జల్లెడ పట్టాలి. ఒక వెడల్పాటి గిన్నెలో నీళ్లు పోసి, గోరు వెచ్చగా కాగబెట్టాలి. నీళ్లలో చిటికెడు ఉప్పు, ఒక టేబుల్ స్పూన్ నెయ్యి/వెన్న, బియ్యప్పిండి వేసి ఉండలు లేకుండా ముద్దలా చేయాలి. పిండి చల్లారాక చిన్న చిన్న ఉండలు చేయాలి.
మరో వెడల్పాటి గిన్నెలో పాలు మరగబెట్టాలి. ఆ పాలలో కొబ్బరి, యాలకుల పొడి, చక్కెర వేసి అది కరిగే వరకు కలుపుతూ ఉండాలి.
ALSO READ : పది రోజుల పెద్ద పండుగ.. వినాయకచవితి..
ఆ తర్వాత ఉండ్రాళ్లను కాగుతున్న పాలలో వేసి ఐదు నిమిషాలు సిమ్లో ఉడికించాలి. స్టవ్ ఆపేసి, పది నిమిషాలు గిన్నె కదిలించకుండా ఉంచితే ఉండ్రాళ్లు విరిగిపోవు.
ఉండ్రాళ్ల తాలింపు తయారీకి కావాల్సినవి
- బియ్యప్పిండి: ఒక కప్పు
- నీళ్లు: ఒక కప్పు
- ఉప్పు: చిటికెడు
- నెయ్యి: ఒక టీ స్పూన్
- ఆవాలు: అర టీ స్పూన్
- జీలకర్ర: అర టీ స్పూన్
- మినప్పప్పు: ఒక టీ స్పూన్
- శెనగపప్పు: ఒక టీ స్పూన్
- పచ్చిమిర్చి లేదా ఎండుమిర్చి: మూడు
- కరివేపాకు: ఒక రెమ్మ
- నూనె: సరిపడా
ఉండ్రాళ్ల తాలింపు తయారీ విధానం
ఒక గిన్నెలో నీళ్లు పోసి వేడి చేయాలి. అందులో కొద్దిగా ఉప్పు, నెయ్యి వేసి మరిగించాలి. మంట తగ్గించి బియ్యప్పిండి వేస్తూ కలపాలి. నిమిషం తర్వాత స్టవ్ ఆఫ్ చేయాలి.
ఆ పిండిని ప్లేట్లోకి తీసుకుని ఆరబెట్టి ముద్దగా చేయాలి. దాంతో చిన్నచిన్న ఉండ్రాళ్లుగా చేయాలి.
నూనె రాసిన ఇడ్లీ ప్లేట్ మీద వీటిని ఉంచి ఆవిరిపై ఉడికించాలి.
తర్వాత స్టవ్పై పాన్పెట్టి నూనె వేడి చేయాలి. అందులో ఆవాలు, జీలకర్ర, మినప్పప్పు, శెనగపప్పు, పచ్చిమిర్చి లేదా ఎండుమిర్చి, కరివేపాకు వేయాలి.
ఆ పోపుని ఉండ్రాళ్లలో వేసి కలపాలి. ఉండ్రాళ్ల పాయసంతోపాటు ఈసారి ఉండ్రాళ్లతో తాలింపు ట్రై చేయండి.
