మల్హర్, వెలుగు: వడ్లు త్వరగా కొనుగోలు చేసి, మిల్లులకు తరలించాలని డిమాండ్చేస్తూ మల్హర్ మండల కేంద్రం తాడిచెర్లలో రైతులు సోమవారం రోడ్డెక్కారు. టెంట్వేసుకొని వంటావార్పుతో నిరసన తెలిపారు. నెల రోజులుగా కొనుగోలు కేంద్రాల్లోనే ఉంటున్నామని, అధికారులు, ప్రజాప్రతినిధులు తీరుతో ధాన్యం సేకరణలో తీవ్ర జాప్యం జరుగుతోందని ఆరోపించారు.
అకాల వర్షాలతో ధాన్యం మొలకెత్తిందని ఆవేదన వ్యక్తం చేశారు. రైతుల ధర్నాతో తాడిచెర్ల జెన్కో ఓపెన్ కాస్ట్ నుంచి భూపాలపల్లికి వెళ్లాల్సిన బొగ్గు లారీలు ఎక్కడికక్కడే నిలిచిపోయాయి. కొయ్యూరు మెయిన్ రోడ్ పై రైతులు ధర్నా చేపట్టారు. 3 వారాలైనా ధాన్యం కొనుగోలు చేయకపోవడంతో మొలకెత్తుతోందని వాపోయారు.
బూరుగుమల్ల గ్రామంలో..
పర్వతగిరి, వెలుగు: బూరుగుమల్ల గ్రామంలో ధాన్యం కొనుగోలు చేయాలంటూ రైతులు సోమవారం రోడ్డుపై ఆందోళన చేపట్టారు. నెల రోజులుగా కాంటా పెట్టకపోవడంతో ఇబ్బందులు పడుతున్నామని ఆవేదన వ్యక్తం చేశారు.
