- కేంద్ర మంత్రి రాజ్నాథ్ సింగ్కు ఎమ్మెల్యే శ్రీగణేశ్ విజ్ఞప్తి
పద్మారావునగర్, వెలుగు: సికింద్రాబాద్ కంటోన్మెంట్ను జీహెచ్ఎంసీలో విలీనం చేయాలని, లేదా బోర్డుకు ఎన్నికలైనా నిర్వహించాలని కేంద్ర రక్షణ శాఖ మంత్రి రాజ్నాథ్ సింగ్ను ఎమ్మెల్యే శ్రీగణేశ్ కోరారు. బుధవారం హైదరాబాద్ పర్యటనకు విచ్చేసిన రాజ్ నాథ్ సింగ్కు కంటోన్మెంట్ సమస్యలపై ఆయన వినతిపత్రం అందజేశారు.
కంటోన్మెంట్ బోర్డు ఎన్నికలు నిర్వహించకపోవడంతో పరిపాలన కుంటు పడిందని, ప్రజల సమస్యలు ఎక్కడివక్కడే ఉన్నాయన్నారు. నియోజకవర్గంలోని పేద ప్రజల సొంతింటి కలను నెరవేర్చాలన్నారు. పేద ప్రజలు నివసిస్తున్న భూములను బదలాయింపు చేసి ఆ భూములను ఫ్రీ హోల్డ్ చేయాలని కోరారు.
అలాగే కంటోన్మెంట్ బోర్డుకు కేంద్ర ప్రభుత్వం చెల్లించాల్సిన రూ.వెయ్యి కోట్ల ఆర్మీ చార్జీలను వెంటనే విడుదల చేయాలని, తద్వారా నిధుల లేమితో ఇబ్బందులు పడుతున్న బోర్డుకు జవజీవాలు అందించాలని విన్నవించారు.
