ఐదేండ్లుగా గ్రీవెన్స్ లేదు!

• సమస్య ఏదై‌‌నా  కొత్తగూడెం పోవాల్సిందే
• పేరుకపోతున్న సమస్యలు

మందమర్రి, వెలుగు: సింగరేణి కార్మికుల సమస్యలు పరిష్కారానికి నోచుకోవడంలేదు. ఐదేళ్లుగా బెల్లంపల్లి రీజియన్​లో గ్రీవెన్స్​సెల్​ నిర్వహించకపోవడంతో ప్రతీ చిన్నసమస్య చెప్పుకునేందుకు ఎంప్లాయీస్ వందల కిలోమీటర్ల దూరంలోని కొత్తగూడెం హెడ్డాఫీస్​ వెళ్లాల్సిన పరిస్థితి ఏర్పడింది. 
 

గ్రీవెన్స్ డేతో పరిష్కారం...
2017లో అప్పటి సింగరేణి డైరెక్టర్​(ఫైనాన్స్), ఇన్ చార్జి పరిపాలన డైరెక్టర్​గా కొనసాగిన పవిత్రన్​ కుమార్​ గ్రీవెన్స్ డేకు శ్రీకారం చుట్టారు. డివిజన్ లేదా రీజియన్​లో ఒకరోజు ఈ కార్యక్రమం జరిగేది. ఒక వేళ సమస్య పరిష్కారం కాకపోతే కార్మికులకు డైరెక్టర్​ చెప్పుకునేవారు. గ్రీవెన్స్ డేకు వచ్చే వారు అనారోగ్య సమస్యపైనే ఎక్కువగా విన్నవించేవారు. ఒక ప్లేస్ నుంచి మరో ప్లేస్​కు ట్రాన్స్​ఫర్​పై వచ్చిన వారికి క్వార్టర్ ఫెసిలిటీ  కల్పించకపోతే దరఖాస్తు చేసుకునే వారు. ఆఫీసర్లు అప్పటికప్పుడే పరిష్కారం చూపేవారు. మైన్స్, డిపార్ట్​మెంట్లలో పనిచేసే ఎంప్లాయీస్ పనిష్మెంట్​చర్యల కింద కోల్పోయే బెనిఫిట్స్, రుజువులేని ఆరోపణలు తదితరాలపై ఫిర్యాదు చేసేవారు. మెడికల్ బోర్డుకు వెళ్లిన వారు ఫిట్, అన్​ఫిట్ అనే విషయాన్ని గ్రీవెన్స్​డేలోనే వెల్లడించేవారు. ట్రాన్స్ ఫర్ల సమస్యకు పరిష్కారం దొరికేది. ఇదంతా 2017 నవంబర్​ వరకు బాగానే సాగింది. తర్వాత యాజమాన్యం పట్టించుకోలేదు.
 

బెల్లంపల్లి రీజియన్​లో..
కార్మికులు తమ ఇబ్బందులను నేరుగా ఉన్నతాధికారులకు చెప్పుకునే అవకాశం ఉన్న గ్రీవెన్స్ డేను పునరుద్ధరించాలని కార్మికులు, కార్మిక సంఘాలు ఒత్తిడి తీసుకరావడంతో గత ఏడాది  జులై 28న కొత్తగూడెం రీజియన్,  సెప్టెంబర్​ 11న రామగుండం రీజియన్​ పరిధిలో యామాన్యం ప్రజావాణి నిర్వహించింది.  ఈ ఏడాది జనవరి 10న బెల్లంపల్లి రీజియన్​ పరిధిలో నిర్వహిస్తామని చెప్పిన యాజమాన్యం కరోనా సాకుతో వాయిదా వేసింది. ఆరు నెలలుగా దాటినా దాని ఊసేఎత్తలేదు. దీంతో ఐదేళ్లుగా   రీజియన్​పరిధిలోని మందమర్రి, శ్రీరాంపూర్​, బెల్లంపల్లి ఏరియాలకు సంబంధించిన 23 వేల మంది కార్మికుల  సమస్యలు పరిష్కారానికి నోచుకోవడంలేదు. ఎంప్లాయీస్​ ప్రతీ చిన్న సమస్య పరిష్కారం కోసం వందల కి.మీ దూరంలోని కొత్తగూడెం సింగరేణి హెడ్డాఫీస్​కు వెళ్లాల్సి వస్తోంది. స్థానిక ఆఫీసర్లు ఏమో సమస్య తమ పరిధిలో లేదని, కార్పొరేట్​కు వెళ్లాలంటూ చెప్పిచేతులు దులుపుకుంటున్నారు.

పాదయాత్రలు బంద్...
కాలనీల్లో కార్మికులు, వారి కుటుంబ సభ్యులు ఎదుర్కొంటున్న సమస్యల పరిష్కారానికి ‘జీఎం పాదయాత్ర’లు బాగా ఉపయోగపడేవి. నేరుగా ఏరియా జీఎం, అన్ని డిపార్ట్​మెంట్ల ఆఫీసర్లతో కలిసి ఒక్కో కాలనీలో పాదయాత్ర చేస్తుంటే కార్మిక కుటుంబాలు తాము ఎదుర్కొనే సమస్యలు వారి కి వివరించేవారు. జీఎం అక్కడిక్కడే సంబంధిత ఆఫీసర్లతో చర్చించి సమస్య పరిష్కారానికి ఆదేశాలిచ్చేవారు. మేజర్ సమస్య ఉంటే కార్పొరేట్​యాజమాన్యం దృష్టికి తీసుకవెళ్లి పరిష్కారం చూపేవారు.  మందమర్రి, బెల్లంపల్లి ఏరియాల్లో దీని ఊసేలేకుండా పోయింది. తిరిగి నిర్వహించాలని కార్మికవర్గం డిమాండ్​చేస్తున్నా.. యాజమాన్యం  పట్టించుకోవడంలేదు