కరోనా సెకండ్ వేవ్ ప్రభావం తగ్గింది. అయితే మూడో వేవ్ ముప్పు పొంచి ఉందని, జాగ్రత్తలు పాటించాల్సిందేనని నిపుణులు సూచిస్తున్నారు. ఇదే తరుణంలో డెల్టా, డెల్టా ప్లస్ వేరియంట్‌‌లు ఆందోళనను కలిగిస్తున్నాయి. ఈ రకం వేరియంట్‌‌లు ఇప్పటికే చాలా దేశాల్లో వ్యాపించాయని తెలుస్తోంది. కరోనాను తరిమికొట్టకుండా డెల్టా వేరియంట్ తమను అడ్డుకుంటోందని అమెరికా వైద్య నిపుణుడు, వైట్ హౌస్ చీఫ్ మెడికల్ అడ్వయిజర్ ఫౌసీ అనడం గమనార్హం. ఈ నేపథ్యంలో సైంటిస్టులు కొత్త పరిశోధనలకు శ్రీకారం చుట్టారు. ప్రపంచవ్యాప్తంగా గుర్తించిన అన్ని కరోనా వేరియంట్‌లను తట్టుకునేలా సార్వత్రిక టీకాను రూపొందించే పనిలో పడ్డారు.
యూనివర్సిటీ ఆఫ్ నార్త్ కరోలినా సైంటిస్టులు యూనివర్సల్ టీకాను తయారు చేసే పనుల్లో బిజీగా ఉన్నారు. వీళ్లు ఓ హైబ్రిడ్ వ్యాక్సిన్‌ను రూపొందించారు. సూపర్ వ్యాక్సిన్‌గా పిలుస్తున్న ఈ టీకా.. భవిష్యత్‌లో వచ్చే కరోనా వేరియంట్ల నుంచి కూడా రక్షణను అందిస్తుందని సమాచారం. ఈ వ్యాక్సిన్‌ను ఎలుకలపై ప్రయోగించగా సక్సెస్ అయ్యామని సైంటిస్టులు తెలిపారు. ఈ టీకా ఎలుకల్లో ప్రవేశపెట్టిన కరోనా వైరస్‌ను ప్రభావవంతంగా అడ్డుకోవడమే కాకుండా ఊపిరితిత్తులకూ రక్షణ కల్పించిందని చెప్పారు. కరోనా కుటుంబం నుంచి ఏ రకం వైరస్ వచ్చినా సమర్థంగా అడ్డుకునేందుకు వ్యాక్సిన్ తయారీపై దృష్టి సారించామన్నారు. మరింత అధ్యయనం తర్వాత వచ్చే ఏడాది మనుషులపై ప్రయోగాలకు రెడీ అవుతున్నామని పేర్కొన్నారు.
