చిట్యాల, వెలుగు : పాఠాలు చెప్పాల్సిన టీచర్ సొంత పనులు చేయించుకుంటూ వేధింస్తుండడంతో స్టూడెంట్స్ అందరూ కలిసి రోడ్డెక్కారు. ‘ఈ టీచర్ మాకొద్దు’ అంటూ రాస్తారోకో చేశారు. విద్యార్థుల కథనం ప్రకారం..జయశంకర్ భూపాలపల్లి జిల్లా చిట్యాల మండలంలోని జూకల్ హైస్కూల్ లో సోషల్ టీచర్.. స్టూడెంట్స్ను ఇంటికి తీసుకువెళ్లి బట్టలు ఉతికించడంతో పాటు టీ కప్పులు కడిగిస్తోంది. ఇంటి పనులన్నీ చేయాలని ఇబ్బందులకు గురి చేస్తోంది. చెప్పిన మాట వినకపోతే మార్కులు తక్కువ వేయడంతో పాటు కొడుతోంది. ఈ విషయం తెలుసుకున్న పిల్లల తల్లిదండ్రులు ఇదివరకు ఒకసారి టీచర్ ను మందలించినా పద్ధతి మార్చుకోలేదు. ఈ వేధింపులు భరించలేని పిల్లలు మంగళవారం ఆందోళనకు దిగారు. స్కూల్ ముందున్న మెయిన్ రోడ్డుపై ప్లకార్డులతో బైఠాయించారు. టీచర్ ను సస్పెండ్ చేయాలని డిమాండ్ చేశారు. రెండు గంటలు ధర్నా చేసిన తర్వాత హెచ్ఎం చంద్రశేఖర్ జోక్యం చేసుకుని టీచర్ పై చర్యలు తీసుకుంటానని హామీ ఇవ్వడంతో ఆందోళన విరమించారు.
అడిషనల్ కలెక్టర్ సీరియస్..
హైస్కూల్ ముందు స్టూడెంట్స్ ధర్నా చేసిన విషయాన్ని తెలుసుకున్న అడిషనల్ కలెక్టర్ దివాకర్.. హెచ్ఎం, సర్పంచ్, ఎంపీటీసీలతో పాటు నలుగురు పిల్లలను పిలిపించుకుని మాట్లాడారు. వివరాలు కనుక్కుని పిల్లలను ఇబ్బందులకు గురిచేసిన టీచర్ పై చర్యలు తీసుకోవాలని ఆదేశించారు.
