చిన్న చిన్న కొండలు, గుట్టలు ఎక్కాలంటేనే ట్రైనింగ్ తీసుకుంటాం. అలాంటిది ఎవరెస్ట్ పర్వతం ఎక్కాలంటే... ట్రైనింగ్ తప్పనిసరి. కానీ, ఈ పదేండ్ల అమ్మాయి మాత్రం ఎలాంటి ట్రైనింగ్ లేకుండానే ఎవరెస్ట్ బేస్ క్యాంప్ వరకు వెళ్లింది. ఎవరెస్ట్ బేస్ క్యాంప్లో అడుగుపెట్టిన చిన్న వయసు అమ్మాయిగా రికార్డు సాధించింది. ముంబైకి చెందిన ఈ పాప పేరు రిధిమా మమానియా.
ఈ చిన్నారి సాహసి గురించి...
ముంబైలోని వర్లీలో ఉంటుంది రిధిమ. ఐదేండ్ల వయసు నుంచే కొండలు ఎక్కడం అంటే ఇష్టం తనకి. ఇంటికి దగ్గర్లో ఉండే శాస్త్రి గార్డెన్కి రోజూ ఉదయం 5 గంటలకు వెళ్లి, చిన్న చిన్న కొండలు ఎక్కడం, దిగడం ప్రాక్టీస్ చేసేది. ఫ్యామిలీతో కలిసి గోవాలోని దూద్సాగర్ వాటర్ఫాల్ని చూసేందుకు వెళ్లిన రోజుని రిధిమ ఎప్పటికీ మర్చిపోదు. కొండ మీదకు వెళ్లేందుకు 21 కిలోమీటర్లు ట్రెక్కింగ్ చేసింది. అంత దూరం ట్రెక్కింగ్ చేయడం అదే మొదటిసారి. ఆ ట్రిప్ రిధిమలో కాన్ఫిడెన్స్ పెంచింది. ఆ తర్వాత సహ్యాద్రి పర్వతాల్లోని మహులీ, సొండాయ్, కర్నాలా, లోహగడ్ వంటి పర్వతాల్ని ఎక్కింది.
మంచు దారిలో 11 రోజుల జర్నీ
పోయిన నెల చివర్లో నేపాల్కు చెందిన ‘సటోరి అడ్వెంచరస్’ గ్రూప్ ఎవరెస్ట్ ట్రిప్ ప్లాన్ చేసింది. తల్లిదండ్రులు ఉర్మి, హర్షల్, మరికొంతమంది మౌంటెనీర్స్తో కలిసి ఎవరెస్ట్ యాత్రకు బయల్దేరింది రిధిమ. ఈ ప్రయాణంలో చల్లని గాలులు, మంచు తుఫాన్లు వణికించినా భయపడలేదు. ఆక్సిజన్ అందక ఊపిరి సరిగా ఆడకున్నా, కాళ్లకు బొబ్బలు వచ్చినా వెనకడుగు వేయలేదు. 11 రోజుల ట్రెక్కింగ్ తర్వాత ఎవరెస్ట్ బేస్ క్యాంప్కి చేరింది. 5,364 మీటర్ల ఎత్తు, మైనస్ పది డిగ్రీల సెల్సియస్ ఉన్న ఆ ప్రాంతానికి వెళ్లగానే సంతోషంతో ఎగిరి గెంతులు వేసింది. జాతీయ జెండాని చూపిస్తూ తాను అనుకున్నది సాధించానంటూ తెగ మురిసి పోయింది. ‘‘బేస్క్యాంప్కి చేరిన తర్వాత రిధిమని హెలికాప్టర్లో కిందకు పంపిద్దాం అనుకున్నాం. కానీ, తను నడుస్తానన్నది. దాంతో తనతో పాటు నలుగురం ట్రెక్కర్స్ వెనక్కి వచ్చేశాం’’ అంది రిధిమ తల్లి.
‘‘స్కేటింగ్తో పాటు ట్రెక్కింగ్ చేయడం అంటే ఇష్టం. చిన్న చిన్న కొండలు ఎక్కిన తర్వాత కాన్ఫిడెన్స్ పెరిగింది. అందుకని ఎవరెస్ట్ బేస్ క్యాంప్కి వెళ్లాలని లక్ష్యంగా పెట్టుకున్నా. చల్లని గాలులు వీస్తున్నా, మంచు పెళ్లలతో నిండిన దారిలో నడిచాను. మంచు తుఫాన్లని చూడడం కొత్త ఎక్స్పీరియెన్స్. పర్వతాల మీది చెత్తను తొలగించడంతో పాటు బాధ్యతగల ట్రెక్కర్గా ఉండడం ఎంత ముఖ్యమో ఈ ట్రిప్ ద్వారా తెలుసుకున్నా. స్కేటింగ్ రింక్ అయినా, ఎవరెస్ట్ బేస్ క్యాంప్ అయినా పట్టుదల ముఖ్యం. అప్పుడే అనుకున్నది సాధిస్తాం” అంటున్న రిధిమ ప్రస్తుతం బాంద్రాలోని మెట్ రిషికుల్ విద్యాలయలో ఐదో క్లాస్ చదువుతోంది.