హైదరాబాద్, వెలుగు: రాష్ట్ర సర్కార్ మరో రూ.1000 కోట్ల అప్పు తీసుకున్నది. మంగళవారం ఆర్బీఐ నిర్వహించిన బాండ్ల వేలంలో పాల్గొని ఈ అప్పును సమకూర్చుకున్నది. దీంతో ఈ నెలలోనే చేసిన మొత్తం అప్పు రూ.5 వేల కోట్లకు చేరుకుంది. ఒకవైపు కేంద్రం రాష్ట్ర అప్పులను కుదించిందని సీఎం కేసీఆర్ చెబుతుంటే.. మరోవైపు ఆర్బీఐ నుంచి అప్పుల పరంపర కొనసాగుతూనే ఉంది. వాస్తవానికి ఈ నెలలో రూ.3 వేల కోట్లే తీసుకోనున్నట్లు రాష్ట్ర ప్రభుత్వం ఇండెంట్ పెట్టుకున్నది. అయితే మరో రెండు వేల కోట్లు అదనంగా తీసుకుంది. దీంతో ఈ ఆర్థిక సంవత్సరంలో ఇప్పటి వరకు తీసుకున్న అప్పుల మొత్తం రూ.12 వేల కోట్లు దాటింది. కేవలం రెండు నెలల్లోనే ఈ అప్పు చేసింది.
రూ.53 వేల కోట్ల అప్పులు తీసుకోవాలని..
ఈ ఫైనాన్షియల్ ఇయర్లో రాష్ట్ర ప్రభుత్వం రూ.53 వేల కోట్ల అప్పులు తీసుకోవాలని బడ్జెట్లో పెట్టుకున్నది. అయితే కేంద్రం రాష్ట్ర అప్పులను రూ.23 వేల కోట్లకు కుదించినట్లు సీఎం కేసీఆర్ పేర్కొన్నారు. ఈ లెక్కన రాష్ట్రం ఇంకా రూ.11 వేల కోట్లు మాత్రమే తీసుకునేందుకు అవకాశం ఉంటుంది. అంతకు ముందు ఆర్థిక శాఖ మంత్రి హరీశ్ రావు మీడియా చిట్చాట్లో భాగంగా రూ.19 వేల కోట్లు అప్పులకు కోత పడిందని చెప్పారు. దీనిపై ఆర్థిక శాఖ ఆఫీసర్లు నోరు మెదపడం లేదు. దీంతో అసలు ఎంత అప్పు వస్తుంది ? ఎవరు కరెక్ట్ చెబుతున్నారనే దానిపై గందరగోళం నెలకొంది.
