- ఆంధ్రా లీడర్లు, ఢిల్లీ గులాములు,
- తెలంగాణ ద్రోహులు అంటూ బీఆర్ఎస్ క్యాంపెయిన్
- ఢిల్లీ పార్టీలకు ఓటెందుకెయ్యాలంటున్న కేసీఆర్
- ఢిల్లీ దొరలకు, తెలంగాణ ప్రజలకు నడుమ యుద్ధమంటున్న కేటీఆర్
- తెలంగాణ ద్రోహులంతా మిలాఖత్ అయ్యిన్రంటున్న హరీశ్రావు
- పార్టీ పేరు మార్చుకున్నంక ఇంకా రెచ్చగొడ్తే ప్రజలు నమ్మరంటున్న ప్రతిపక్షాలు
హైదరాబాద్, వెలుగు : రాష్ట్రంలో మళ్లీ తెలంగాణ ‘సెంటిమెంట్’ పాలిటిక్స్ స్టార్ట్ అయ్యాయి. మొన్నటి దాకా సంక్షేమం, డెవలప్మెంట్ మీద నడిచిన బీఆర్ఎస్ నేతల క్యాంపెయిన్.. ఉన్నట్టుండి దిశమార్చుకున్నది. ఢిల్లీ పార్టీలకు తెలంగాణను అప్పగిద్దామా? గులాములమవుదామా? తెలంగాణ ద్రోహులంతా మిలాఖత్ అయిన్రు.. అంటూ బీఆర్ఎస్ నేతలు ప్రచారం మొదలుపెట్టారు. కేటీఆర్, హరీశ్తోపాటు కేసీఆర్ కూడా ఇదే పంథాను ఎంచుకున్నట్లు ప్రసంగాలను చూస్తే తెలుస్తున్నది.
స్పీచుల్లో పదును తగ్గిందన్న ఫీడ్ బ్యాక్తోనే ఇట్ల సెంటిమెంట్ వైపు కేసీఆర్ కూడా టర్న్ తీసు కున్నట్లు పొలిటికల్ సర్కిల్స్లో చర్చ జరుగుతున్నది. 2014, 2018 ఎన్నికల మాదిరిగానే ఇప్పుడూ ‘సెంటిమెంట్’తో ముందుకెళ్తే వర్కౌట్ అవుతుందన్న ఆలోచనలో బీఆర్ఎస్ ఉన్నట్లు తెలుస్తున్నది. అయితే, పార్టీ నుంచి ‘తెలంగాణ’ పదాన్ని తీసేసిన కేసీఆర్కు, గులాబీ నేతలకు ఇప్పుడు ‘తెలంగాణ’ సెంటిమెంట్ ఎత్తుకునే అర్హత లేదని, వాళ్ల మాటలను ప్రజలు మళ్లీ నమ్మే పరిస్థితుల్లో లేరని ప్రతిపక్షాలు అంటున్నాయి.
బీఆర్ఎస్గా మార్చి..ఆంధ్రాకు అధ్యక్షుడ్నీ నియమించి..!
తెలంగాణ రాష్ట్ర సమితి (టీఆర్ఎస్)ని భారత రాష్ట్ర సమితి (బీఆర్ఎస్)గా మార్చి, జాతీయ రాజకీయాల్లో వస్తున్నామని ఏడాది కింద కేసీఆర్ ప్రకటించారు. ఢిల్లీలో బీఆర్ఎస్ కోసం ఆఫీసు కూడా కట్టుకున్నారు. ఆంధ్రప్రదేశ్కు ప్రత్యేకంగా పార్టీ రాష్ట్ర అధ్యక్షుడ్ని కూడా నియమించారు. మహారాష్ట్రలో అనేక సభలు కూడా పెట్టారు. ప్రత్యామ్నాయ కూటమి అంటూ ప్రయత్నాలు చేశారు. జాతీయ స్థాయిలో వివిధ పార్టీల నేతలను కలిశారు. అలాంటిది ఇప్పుడు ఒక్కసారిగా గేర్ మార్చేశారు. ఆంధ్రా లీడర్లు, తెలంగాణ ద్రోహులు, ఢిల్లీ గులాములు అంటూ ప్రసంగాలు స్టార్ట్ చేశారు.
సడన్ చేంజ్!
కేసీఆర్ మొదటి విడత సభల్లో డెవలప్మెంట్, వెల్ఫేర్ పైనే ఆయన ఎక్కువగా మాట్లాడారు. దీనికి జనం నుంచి అంతగా స్పందన రాలేదని ఆ పార్టీ నేతలకు ఫీడ్ బ్యాక్ అందింది. దీంతో రెండో విడత ప్రచారంలో మార్పులు చేశారు. సత్తుపల్లి సభలో ఏపీ రోడ్ల పరిస్థితులపై కేసీఆర్ వ్యంగ్యాస్త్రాలు సంధించారు. ‘‘డబుల్ రోడ్డు వస్తే తెలంగాణ.. సింగిల్ రోడ్డు వస్తే ఆంధ్రప్రదేశ్’’ అంటూ మాట్లాడారు. ఆ తర్వాత ఈ ఎన్నికలు ‘‘ఢిల్లీ దొరలకు.. తెలంగాణ ప్రజలకు మధ్య జరుగుతున్న యుద్ధం” అంటూ మంత్రి కేటీఆర్ కామెంట్స్ చేశారు. ఢిల్లీ దొరలకు తెలంగాణ తలవంచదని ఆయన అన్నారు.
కేసీఆర్ తన ప్రసంగాల్లో రాబోయేది ప్రాంతీయ పార్టీల యుగమే అని చెప్తున్నారు. ‘‘ఢిల్లీ పార్టీలకు ఓటెందుకెయ్యాలి? బీజేపీ, కాంగ్రెస్ పార్టీల్లో ఎవడన్నా తెలంగాణ జెండా ఎత్తిండా? ఉద్యమాన్ని భుజాన వేసుకున్నడా? మనం ఎత్తుకున్నప్పుడల్లా మనల్ని అవమానపరిచిన్రు. ఈ ఢిల్లీ గులాముల కింద ఉండి మనం కూడా గులాములమవుదామా” అంటూ స్పీచ్లు ఇస్తున్నారు. నాలుగురోజుల కింద సంగారెడ్డిలో మంత్రి హరీశ్రావు మాట్లాడుతూ.. తెలంగాణ ద్రోహులంతా ఒక్కటైతున్నరని వ్యాఖ్యానించారు.
తిప్పికొడ్తున్న ప్రతిపక్షాలు
కేసీఆర్ ప్రయోగించే తెలంగాణ సెంటిమెంట్ వ్యూహా నికి కాలం చెల్లిందని, ప్రభుత్వంపై ఉన్న వ్యతిరేకతను ఏమార్చడానికే మరోసారి తెలంగాణ, -ఆంధ్రా సెంటిమెంట్ రెచ్చగొడుతున్నారని ప్రతిపక్ష నేతలు మండిపడుతున్నారు. టీఆర్‌‌ఎస్‌‌ను రద్దు చేసి బీఆర్ఎస్గా మార్చుకొని ఇతర రాష్ట్రాల్లో పోటీకి దిగుతామ ని చెప్పిన కేసీఆర్ మాటలను గుర్తుచేస్తున్నారు. బీఆర్ఎస్ సెంటిమెంట్ రాజకీయాలను ప్రచారంలో కాంగ్రెస్, బీజేపీ, బీఎస్పీ తిప్పికొడ్తున్నాయి.
