- ఫండింగ్ నిలిచిపోతే చాలా దేశాల్లో ఇదే పరిస్థితి
- వరల్డ్ ఫుడ్ ప్రోగ్రాం హెచ్చరిక
- ఎకానమీ దెబ్బతిందని మాకు నిధులు ఆపొద్దు
- ప్రపంచ దేశాలు ఆలోచించి నిర్ణయం తీసుకోవాలి
- డబ్ల్యూఎఫ్పీ ఎగ్జిక్యూటివ్ డైరెక్టర్ బీస్లే
న్యూఢిల్లీ: కరోనా వైరస్ మహమ్మారి కారణంగా ప్రపంచవ్యాప్తంగా 3 కోట్ల మంది ఆకలితో చనిపోయే పరిస్థితులు ఉన్నాయని వరల్డ్ఫుడ్ ప్రోగ్రాం(డబ్ల్యూఎఫ్పీ) హెచ్చరించింది. ఈ మహమ్మారి వల్ల తీవ్రంగా ప్రభావితమైన వారికి సాయం చేసేందుకు నిధులు అందకపోతే పరిస్థితి దారుణంగా ఉంటుందని చెప్పింది. యునైటెడ్ నేషన్స్కు అనుబంధంగా ఉండే డబ్ల్యూఎఫ్పీ ఎగ్జిక్యూటివ్ డైరెక్టర్ డేవిడ్ బీస్లే ఇటీవలే కరోనా బారిన పడి కోలుకున్నారు. తమ సంస్థ ప్రపంచవ్యాప్తంగా పది కోట్ల మందికి వివిధ దేశాల ప్రభుత్వాల ఆర్థిక సాయంతో ఆహారం అందిస్తోందని, వీరిలో 3 కోట్ల మందికి ఈ ఆహారం ఎంతో అవసరమని ఆయన చెప్పారు. ఒకవేళ కరోనా వైరస్ ప్రభావం కారణంగా ఆర్థిక వ్యవస్థలు దెబ్బతిని, తమకు ఇచ్చే నిధులకు కోత విధించాలని ప్రభుత్వాలు నిర్ణయిస్తే దాని ప్రభావం చాలా ఎక్కువగా ఉంటుందన్నారు. ‘‘మాకు ఫండింగ్ ఆగిపోతే.. ప్రపంచవ్యాప్తంగా రోజుకు 3 లక్షల మంది చొప్పున మూడు నెలల్లో కనీసం 3 కోట్ల మంది ఆకలితో చనిపోతారు”అని చెప్పారు. ‘‘ఈ పరిస్థితులను గుర్తించి ప్రపంచ దేశాల నేతలు కరోనా రెస్పాన్స్ను బ్యాలెన్స్ చేసుకోవాలి. లేకుండా కరోనా వల్ల ఎదురయ్యే ఆర్థిక ఇబ్బందుల కారణంగా కోట్లాది మంది ఆకలితో చనిపోయే పరిస్థితి వస్తుంది”అని వివరించారు.
వైరస్ ఎలా వచ్చిందో తెలియదు
బీస్లేకు మార్చి 13న కరోనా సింప్టమ్స్ కనిపించాయి. కెనడాలో డబ్ల్యూఎఫ్పీ కొత్త ఆఫీస్ ఓపెనింగ్ కోసం ఒట్టావాతో పాటు పలు ప్రాంతాలకు తిరిగడంతో ఆయన కరోనా సోకింది. దీంతో అమెరికా సౌత్ కరోలినాలోని డార్లింగ్టన్లోని తన ఇంటికే పరిమితమయ్యారు. మొదట్లో తనకు ఎలర్జీ సోకిందని భావించినా.. దీంతో టెస్టులు చేయగా కరోనా పాజిటివ్ అని తేలింది. బీస్లేతో పాటు కెనడా ప్రోగ్రాంలో పాల్గొన్న ఫెడరల్ పార్లమెంటరీ సెక్రెటరీ ఫర్ ఇంటర్నేషనల్ డెవలప్మెంట్ కమల్ ఖేరాకు కూడా వైరస్ సోకింది. బీస్లేతో కలసి ఆమె ఆ ప్రోగ్రాంలో ఫొటో దిగారు. ప్రస్తుతం ఆమె కోలుకుంటున్నారు. వీరిద్దరికీ కరోనా రావడంతో ఆ సమయంలో వీరిని కలిసిన వారిని అప్రమత్తం చేశారు. తాను వెళ్లిన ప్రతి చోటా హ్యాండ్ శానిటైజర్ వాడానని, తాను చాలా జాగ్రత్తగా ఉంటానని కానీ తనకు వైరస్ఎలా వచ్చిందో అర్థం కాలేదని చెప్పారు.
ప్రస్తుతం వర్క్ఫ్రం హోం చేస్తున్నా
ప్రస్తుతం తాను వర్క్ ఫ్రం హోం చేస్తున్నానని, డబ్ల్యూఎఫ్పీ ఫండింగ్కు సంబంధించి రోజు ప్రపంచ దేశాల నేతలతో మాట్లాడుతున్నానని బీస్లే చెప్పారు. ఆహారం, ఇతర వస్తువుల సరఫరాకు ఇబ్బందులు కలగకుండా చూడాలని వారిని కోరానన్నారు. ప్రస్తుతం 97 శాతం మంది డబ్ల్యూఎఫ్పీ స్టాఫ్ ఫీల్డ్లో పనిచేస్తున్నారని, కరోనా ప్రభావిత ప్రాంతాల్లో ప్రజలకు ఆహారం సప్లై చేస్తున్నారని చెప్పారు. దీనికి కూడా చాలా ఇబ్బందులు ఎదురవుతున్నాయని, కొన్ని దేశాలు ఆహార పదార్థాలు తీసుకెళ్లే ట్రక్కులు, ఎయిరోప్లేన్లను రెండు వారాలు క్వారంటైన్లో ఉంచాలని సూచిస్తున్నాయని, కానీ అన్ని రోజులు వాటిని వాడకుండా ఉంటే చాలా మంది ఆకలితో చనిపోతారని వివరించారు. యునైటెడ్ నేషన్స్ ఎమర్జెన్సీ ఆపరేషన్స్ముఖ్యంగా డబ్ల్యూహెచ్వో, యూఎన్ రెఫ్యూజీ ఏజెన్సీ, యునిసెఫ్ కు సంబంధించిన టెస్టింగ్ కిట్స్, మాస్క్, వ్యక్తిగత రక్షణ పరికరాలను డబ్ల్యూఎఫ్పీ ప్రపంచవ్యాప్తంగా ట్రాన్స్పోర్ట్ చేస్తుంటుంది. ప్రస్తుతం ఇవి తయారయ్యే దుబాయ్, అట్లాంటా, గ్వాంగ్ఝూ మొదలైన ప్రాంతాల్లో హబ్లను ఏర్పాటు చేసింది. ఇక్కడి నుంచి విమానాలు, ఓడల్లో వీటిని రీజినల్ హబ్స్కు చేరవేస్తుంది. అక్కడి నుంచి అవి ఎక్కువగా అవసరమయ్యే కంట్రీలకు సప్లై చేస్తుంది. ఈ హబ్స్కు సపోర్ట్గా 350 మిలియన్ల అమెరికన్ డాలర్లు కావాలని డబ్ల్యూఎఫ్పీ కోరుతోంది. కానీ బుధవారం నాటికి ఇందులో 20 శాతమే వచ్చింది.