109 ప్రయోగాలు చేస్తే 48 విఫలం
తొలి ప్రయత్నంలో చేరుకోలేకపోయిన అమెరికా
చంద్రయాన్2 ప్రయోగం మొత్తం ఫెయిలైపోయిందని చెప్పలేం. ఎందుకంటే, చేరాల్సిన కక్ష్యలను విజయవంతంగా దాటుకుని ముందుకెళ్లాం. ఆర్బిటర్ను కక్ష్యలో పెట్టాం. విక్రమ్ను చంద్రుడి దాకా తీసుకెళ్లాం. ల్యాండింగ్ అయ్యేటప్పుడు దాని నుంచి జస్ట్ సిగ్నళ్లను మాత్రమే మనం కోల్పోయాం. ఇప్పుడప్పుడే దానికి ఏం జరిగిందన్నది చెప్పలేం. మిషన్ ఫెయిల్ అయిందనడానికీ లేదు. ఎందుకంటే, మిషన్లో 95 శాతం సక్సెసేనని, ఒక్క 5 శాతం మాత్రమే ఫెయిల్ అని సైంటిస్టులు చెబుతున్నారు. మరి, ఇప్పటిదాకా ప్రపంచంలో జరిగిన చంద్రుడి ప్రయోగాలు చాలానే ఫెయిలయ్యాయి. ఇప్పుడు మూన్ ప్రయోగాల్లో సక్సెస్ చూసిన దేశాలు, మొదట్లో వైఫల్యాన్ని రుచి చూసినవే. 60 ఏళ్లలో చేసిన మూన్ మిషన్లలో 40 శాతం ఫెయిలయ్యాయంటే నమ్ముతారా? నాసా చందమామ నిజాలు అన్న నివేదిక అదే చెబుతోంది.
చంద్రయాన్ 2కు ముందు 109 ప్రయోగాలు జరిగితే అందులో 61 ప్రయోగాలు సక్సెస్ అయ్యాయి. 48 మిషన్లు ఫెయిలయ్యాయి. ఈ ఏడాది ఏప్రిల్లో ఇజ్రాయెల్ పంపిన స్పేస్క్రాఫ్ట్ కూడా విక్రమ్ లాగే ల్యాండ్ అవ్వబోయింది. కాకపోతే అది కూలిపోయింది. ఈ ఏడాది ఫిబ్రవరిలో స్పేస్ఎక్స్ రాకెట్ ద్వారా కేప్కెనవెరాల్ నుంచి బియర్షీట్ పేరుతో ఇజ్రాయెల్ చంద్రుడిపై ప్రయోగం చేసింది. ఇజ్రాయెల్ చేసిన మొట్టమొదటి లూనార్ మిషన్ అది. స్పేస్ఐఎల్ అనే సంస్థ ఆధ్వర్యంలో ఆ ప్రయోగం చేసింది. చంద్రుడి వరకు బాగానే వెళ్లిన బియర్షీట్ ఏప్రిల్ 11న చంద్రుడిపై క్రాష్ల్యాండ్ అయింది. చివరి నిమిషాల్లో ల్యాండర్ ఇంజన్ ఆగిపోయింది. అయితే, చివరి నిమిషంలో మళ్లీ ఇంజన్ను ఆన్ చేసినా ఫలితం లేకపోయింది. కమ్యూనికేషన్ కట్ అయింది. ప్రయోగంలో తాము ఫెయిలైనా చివరి వరకూ ప్రయత్నించామని స్పేస్ఐఎల్ ప్రకటించింది. చంద్రుడిపై అయస్కాంత క్షేత్రాలను గుర్తించే పరికరాలు, కెమెరాలను బియర్షీట్లో పంపించింది.
1958 నుంచి 2019 మధ్యలో ఇండియా, అమెరికా, సోవియట్ యూనియన్ (రష్యా), జపాన్, యూరోపియన్ యూనియన్, చైనా, ఇజ్రాయెల్ వంటి దేశాలు చందమామపై ప్రయోగాలు చేశాయి. 1958 ఆగస్టు 17న తొలిసారిగా పయనీర్ పేరుతో అమెరికా ప్రయోగం చేసింది. అయితే, అది ఫెయిలైంది. మొట్టమొదటిసారిగా విజయవంతమైన చంద్రుడి ప్రయోగం లూనా 1. 1959 జనవరి 4న సోవియట్ యూనియన్ ఆ ప్రయోగం చేసింది. ఇది జస్ట్ ఫ్లైబై మాత్రమే. అంటే అక్కడి వరకు వెళుతుందంతే. ఇదే మొదటి సక్సెస్ఫుల్ ఫ్లైబై మిషన్ కూడా. ఈ సక్సెస్ కూడా ఊరికే ఏం రాలేదు. ఆరు ప్రయోగాలు జరిగిన తర్వాతే గెలుపు సాధ్యమైంది. 1958 ఆగస్టు నుంచి 1959 నవంబర్ మధ్య అమెరికా, రష్యాలే 14 మూన్ మిషన్స్ చేశాయి. తొలిసారిగా చంద్రుడి ఫొటోలు తీసింది మాత్రం నాసా ప్రయోగించిన రేంజర్ 7 ప్రయోగం ద్వారానే. చంద్రుడిపై తొలిసారి దిగింది మాత్రం రష్యానే. 1966 జనవరిలో లూనా 9 ఆ ఘనత సాధించింది.
