రాష్ట్రవ్యాప్తంగా సుమారు 500కు పైగా గ్రామాలు జలదిగ్బంధంలో చిక్కుకున్నాయి. భద్రాచలం ఏజెన్సీలో గోదావరి ఉప్పొంగడంతో వాజేడు, వెంకటాపురం, చర్ల, దుమ్ముగూడెం మండలాలకు రాకపోకలు పూర్తిగా నిలిచిపోయాయి. భద్రాచలం డివిజన్లోని మన్యంలోనే 62 గ్రామాలకు వేరే ఊర్లతో సంబంధాలు తెగిపోయాయి. మంచిర్యాల జిల్లాలో 50, ఆసిఫాబాద్ జిల్లాలో 50, ఆదిలాబాద్ జిల్లాలో 45, భూపాలపల్లి జిల్లాలో 45 , ములుగు జిల్లాలో 35 గ్రామాలు జలదిగ్బంధంలో చిక్కుకున్నాయి. ఇందులో గోదావరి ముంపు గ్రామాలు ఎక్కువగా ఉన్నాయి. ఆయా గ్రామాల ప్రజలు నిత్యావసర వస్తువులు, అత్యవసర పరిస్థితుల్లో వైద్యానికి ఇబ్బందులు పడ్తున్నారు. రోడ్లు దెబ్బతినడం, వాగులు ఉప్పొంగుతుండడంతో అంబులెన్స్లు కూడా వెళ్లక రోగులు, గర్భిణులు నరకం చూస్తున్నారు. సరైన తాగునీరులేకపోవడం, పరిసరాలు అపరిశుభ్రంగా ఉండడంతో వందలాది గ్రామాల్లో విషజ్వరాలు ప్రబలే ప్రమాదముందనే ఆందోళన వ్యక్తమవుతోంది.
