కూకట్పల్లి, వెలుగు: ఆరేండ్లుగా ఓ కేసు విషయంలో తనకు న్యాయం జరగట్లేదని కూకట్పల్లి కోర్టు ఆవరణలో ఓ వృద్ధుడు చెయ్యి కోసుకున్నాడు. పోలీసులు తెలిపిన వివరాల ప్రకారం.. కేపీహెచ్బీ కాలనీ మూడో ఫేజ్లో ఉండే సాల్మన్రాజు(52) 2008లో ప్రశాంత్నగర్లో ఒక షెడ్డు అద్దెకు తీసుకుని ఫ్యాబ్రికేషన్ వర్క్షాపు నడిపేవాడు. కొన్నేండ్లు బిజినెస్ మంచిగా సాగగా, 2015 నాటికి నష్టాలు వచ్చాయి. దీంతో షెడ్డు యజమాని రామకృష్ణకు ఏడాది పాటు రెంట్ కట్టలేకపోయాడు. కొన్నాళ్లు సాల్మన్ రాజు షెడ్డు క్లోజ్ చేశాడు. ఆ టైంలో యజమాని రెంట్ కోసం ఒత్తిడి చేశాడు. తర్వాత రామకృష్ణ షెడ్డును కూలగొట్టాడు. విషయం తెలుసుకున్న సాల్మన్ రాజు 2016 అక్టోబర్ఒకటో తేదీన కూకట్పల్లి పోలీసులకు ఫిర్యాదు చేశాడు.
షెడ్డులోని తన సామగ్రి షెడ్డు యజమాని మాయం చేశాడని అందులో పేర్కొన్నాడు. కేసు నమోదు చేసిన పోలీసులు రామకృష్ణను అరెస్టు చేసి రిమాండ్కు పంపారు. అప్పటి నుంచి కేసు కోర్టులో ఉంది. ఆరేండ్లు దాటినా తనకు న్యాయం జరగడం లేదని సోమవారం మధ్యాహ్నం మద్యం తాగి కూకట్పల్లి కోర్టుకు వచ్చాడు. పీపీ చాంబర్ వద్ద గొంతు కోసుకోవటానికి ప్రయత్నం చేయగా అక్కడే ఉన్న లాయర్లు అడ్డుకున్నారు. ఈ క్రమంలో చేతిని కోసుకుని ఆత్మహత్యాయత్నం చేశాడు. ప్రస్తుతం సాల్మన్రాజు గాంధీ హాస్పిటల్లో చికిత్స పొందుతున్నాడు.
