బెంగళూరు: ఎయిర్పోర్టులో తబాదలైన లగేజీ కోసం ఓ ప్రయాణికుడు ఏకంగా ఎయిర్లైన్స్ వెబ్సైట్నే హ్యాక్ చేసిండు.. సైట్లోకి వెళ్లి తనతోటి ప్రయాణికుడి ఫోన్ నెంబర్ వెతికి పట్టుకున్నడు. తనతో పాటు తెచ్చిన బ్యాగ్ను తీసుకెళ్లి ఇచ్చి, తన బ్యాగును తీసుకొచ్చుకున్నడు. ఈ తతంగాన్నంతా ట్విట్టర్లో పెట్టడంతో అది కాస్తా వైరల్ అయింది. పోయిన ఆదివారం బెంగళూరు ఎయిర్పోర్టులో జరిగిందీ సంఘటన.. బెంగళూరుకు చెందిన నందన్ కుమార్ ఓ సాఫ్ట్వేర్ ఇంజనీర్.. పనిమీద పాట్నా వెళ్లిన నందన్ ఇండిగో ఫ్లైట్లో ఆదివారం తిరిగొచ్చిండు. అయితే, ఎయిర్పోర్టులో లగేజీ కలెక్ట్ చేసుకునే టైమ్లో పొరపాటున వేరే ప్రయాణికుడి బ్యాగ్ను నందన్ తీసుకెళ్లిండు. చిన్న తేడాలు మినహాయిస్తే ఆ బ్యాగ్ కూడా తన బ్యాగ్లానే ఉండడంతో ఈ పొరపాటు జరిగిందని చెప్పాడు. బ్యాగ్ తబాదలైన సంగతి ఇంటికెళ్లాక గానీ గుర్తించలేదు. ఆ తర్వాత ఇండిగో ఎయిర్లైన్స్ కస్టమర్ కేర్కు ఫోన్ చేసి జరిగిన పొరపాటు గురించి చెప్పిండు. బ్యాగ్ కోసం రోజంతా వేచి చూసినా ఉపయోగంలేకుండా పోయిందన్నడు. ఆ ప్రయాణికుడి ఫోన్ నెంబర్ చెప్పాలని కోరితే ప్రైవసీ పేరుతో కుదరదని చెప్పిన్రట. దీంతో బ్యాగు మీద రాసిన పీఎన్ఆర్ నెంబర్తో వివరాలు తెలుసుకుందామని చేసిన ప్రయత్నం కూడా వృధా అయ్యిందని చెప్పాడు. దీంతో తన సాఫ్ట్వేర్ తెలివితేటలు ఉపయోగించి ఇండిగో వెబ్సైట్ను హ్యాక్ చేసి సదరు ప్రయాణికుడి ఫోన్ నంబర్ తెలుసుకున్నానని చెప్పిండు. ఆపై ఫోన్ చేసి బయట కలుసుకున్నానని, ఆయన బ్యాగును ఇచ్చేసి తన బ్యాగును తెచ్చుకున్నానని నందన్ చెప్పాడు. మీ వెబ్సైట్లో ఫలానా లొసుగు ఉందని ఇండిగో ఎయిర్లైన్స్ వాళ్లను హెచ్చరించానని అన్నడు. అయితే, తమ వెబ్సైట్ను హ్యాక్ చేయడం సాధ్యం కాదని ఇండిగో ఎయిర్లైన్స్ పేర్కొంది.
