టెక్సస్: అమెరికాలో ఓ సెల్ఫ్ డ్రైవింగ్ కారు తన కొత్త యజమానిని వెతుక్కుంటూ ఇంటికి వెళ్లింది. ఫ్యాక్టరీ నుంచి తనకు తానుగా ప్రయాణించి యజమాని వద్దకు చేరుకుంది. టెక్సస్లోని ఆస్టిన్లో తనను తానే డెలివరీ చేసుకుంది.
ప్రపంచంలోనే తొలిసారిగా సెల్ఫ్ డెలివరీ చేసుకున్న వాహనంగా టెస్లా కంపెనీ కొత్త మోడల్ వై రికార్డులకెక్కింది. గిగా ఫ్యాక్టరీ నుంచి కారు బయలుదేరిన టెస్లా కారు.. ట్రాఫిక్ రూల్స్ పాటిస్తూ, లేన్ లు మారుతూ, రోడ్లు దాటుతూ, మలుపులు తిరుగుతూ ప్రయాణించింది.
ట్రాఫిక్ ను అంచనా వేస్తూ, మిగతా వాహనాలను గమనిస్తూ సొంతంగా నిర్ణయాలు తీసుకుంది. ఓ దశలో కారు గంటకు 110 కి.మీ.వేగంతో ప్రయాణించిందని టెస్లా నిర్వాహకులు తెలిపారు. ఈ ప్రయాణం సందర్భంగా కారు వెనక సీటులో ఓ ఉద్యోగి కూర్చుని వీడియో తీశారు.
ఫ్యాక్టరీ నుంచి కస్టమర్ ఇంటికి చేరేంత వరకూ 30 నిమిషాల నిడివి ఉన్న ఈ వీడియోను 3 నిమిషాలకు కుదించి టెస్లా తన సోషల్ మీడియా ఖాతాలో పోస్ట్ చేసింది. గంటల వ్యవధిలోనే ఈ వీడియో వైరల్గా మారింది.
