కొత్తకోట, వెలుగు: వనపర్తి జిల్లా కొత్తకోట పట్టణంలోని బాలుర ప్రభుత్వ పాఠశాలలో మెడిటేషన్ చేయడం ఇష్టం లేక మంగళవారం గోడను దూకి పారిపోవడానికి ప్రయత్నించిన విద్యార్థికి కరెంట్ షాక్ తో తీవ్ర గాయాలయ్యాయి. ప్రిన్సిపల్ ప్రవీణ్ కుమార్ తెలిపిన వివరాల ప్రకారం.. ఉదయం బడి గంటకు ముందే రామకృష్ణ అనే టీచర్ స్టూడెంట్లతో మెడిటేషన్ చేయిస్తారు. 8వ తరగతి చదువుతున్న యుగంధర్ అనే స్టూడెంట్ మెడిటేషన్ చేయడం ఇష్టం లేక గోడ దూకి స్కూల్ నుంచి బయటకు పారిపోవాలనుకున్నాడు.
స్కూల్ కాంపౌండ్ అవతలకు పుస్తకాల బ్యాగ్ విసిరివేసి గోడ దూకేందుకు ప్రయత్నించాడు. గోడ దూకేటప్పుడు ఎర్త్ వైర్ మీద పడ్డాడు. ఎర్త్ వైర్ ట్రాన్స్ఫార్మర్కు తగలడంతో పెద్ద శబ్దంతో యుగంధర్కు షాక్ తగిలింది. వెంటనే పొగలు వచ్చి ఫ్యూజులు ఎగిరిపోవడంతో పెద్ద ప్రమాదం తప్పింది. యుగంధర్ను వనపర్తి జిల్లా ఆస్పత్రిలో చికిత్స అందించారు.
