వెలుగు బిజినెస్ డెస్క్ అమెరికాలో ఉద్యోగాలు చేస్తున్న మన భారతీయులు ఎక్కువ చదువుకున్న వాళ్లని, సంపాదనలోనూ వారే ముందున్నారని ఒక స్టడీలో తేలింది. ఇతర దేశాల నుంచి వలస వచ్చిన వాళ్లతో పోల్చినా, అమెరికన్లతో పోల్చినా భారతీయుల ఆదాయం ఎక్కువగా ఉందని వాషింగ్టన్కు చెందిన మైగ్రేషన్ పాలసీ ఇన్స్టిట్యూట్ రీసెర్చ్ (ఎంపీఐ) స్టడీ వెల్లడించింది.మన దేశం నుంచి అమెరికా వెళ్లిన వారి కుటుంబాలు 2021 లో సగటున 1.5 లక్షల డాలర్లను ఆర్జించగా, ఇతర దేశాల వలసదారుల కుటుంబాలు, అమెరికన్ కుటుంబాల సంపాదన ఇందులో సగం కంటే తక్కువగా అంటే 70 వేల డాలర్లుగానే ఉందని ఈ స్టడీ పేర్కొంది.
80 శాతం మందికి బాచిలర్ డిగ్రీ....
2021 డేటా ప్రకారం 25 ఏళ్లు, దానికి పైబడిన భారత ఇమిగ్రెంట్స్లో 80 శాతం మంది బాచిలర్ డిగ్రీ ఉన్న వారేనని తేలింది. ఇతర దేశాల నుంచి వలస వచ్చిన వారు లేదా అమెరికన్లలో మూడో వంతు మందికి మాత్రమే బాచిలర్ డిగ్రీ ఉంది. ఇక అడ్వాన్స్డ్ డిగ్రీల విషయం చూస్తే, 49 శాతం మంది మన వాళ్లకి గ్రాడ్యుయేట్ డిగ్రీనో లేదా ప్రొఫెషనల్ డిగ్రీనో ఉన్నాయి. ఇతర దేశాల వారిలో కేవలం 15 శాతం మందికి, అమెరికన్లలో కేవలం 13 శాతం మందికే బాచిలర్ లేదా ప్రొఫెషనల్ డిగ్రీ ఉన్నట్లు స్టడీ పేర్కొంది. అమెరికాలో మన ఇండియన్లలో అమెరికా రెసిడెంట్ హోదా పొందిన వాళ్లు 49 లక్షల మంది. వీరిలో కొంత మంది ఇండియాలో పుట్టిన వారైతే, మరికొంత మంది పూర్వీకులు భారతీయులు. అమెరికాలోని మిగతా వలస జనాభాలో ఎక్కువ మంది మెక్సికన్లుండగా, ఆ తర్వాత రెండో ప్లేస్లో మన వాళ్లు నిలుస్తున్నారు. చైనీయులు, ఫిలిప్పినోస్ కంటే మన వాళ్లే ఎక్కువ మంది ఉండటం విశేషం. అమెరికాలోని మొత్తం ఇమిగ్రెంట్స్లో భారతీయ సంతతికి చెందిన జనాభా 2021లో 6 శాతమని, ఇది క్రమంగా పెరుగుతోందని ఎంపీఐ స్టడీ వెల్లడించింది.
ఇప్పుడు వెళ్లే వాళ్లందరూ నిపుణులే.....
19, 20 శతాబ్దాలలో మన దేశం నుంచి ఎక్కువ మంది తక్కువ నైపుణ్యం ఉన్న వాళ్లే అమెరికాకు వలస వెళ్లేవారు. రెండో ప్రపంచ యుద్ధం తర్వాత ఈ పరిస్థితి మారి, ప్రొఫెషనల్స్ ఎక్కువ మంది అమెరికాకు వెళ్తున్నారు. అలాగే అనేక మంది ఇండియన్లు అమెరికాలోని కాలేజీలు, యూనివర్శిటీలలో చదువుకుని బయటకు వస్తున్నారు. భారతీయులలో ఎక్కువ మంది ఉద్యోగాల వల్లో కుటుంబ సంబంధాల ద్వారానో అమెరికాలో ఉంటున్నట్లు ఈ స్టడీ తెలిపింది. అమెరికాలో హయ్యర్ ఎడ్యుకేషన్ ఎడ్మిషన్ తీసుకుంటున్న వారిలో మన దేశం రెండో ప్లేస్లో నిలుస్తోంది. ఎంప్లాయర్లు స్పాన్సర్ చేసే హెచ్1 బీ టెంపొరరీ వీసాలు పొందే హై స్కిల్డ్ వర్కర్లలో కూడా ఎక్కువ మంది మన దేశానికి చెందిన వారే ఉంటున్నారు.
20 శాతం మంది కాలిఫోర్నియాలోనే.....
ఇండియన్ ఇమిగ్రెంట్స్లో 20 శాతం మంది కాలిఫోర్నియాలో నివసిస్తుండగా, ఆ తర్వాత టెక్సాస్లో 11 శాతం, న్యూ జెర్సీలో 10 శాతం మంది (2015-19 మధ్య కాలంలో) నివసిస్తున్నట్లు ఈ స్టడీ పేర్కొంది. యూఎస్ సెన్సస్ బ్యూరో తాజా డేటాలో ఈ వివరాలున్నాయి. ఇక ఎక్కువ మంది ఇండియన్లు నివసించే నగరాలను చూస్తే గ్రేటర్ న్యూయార్క్, చికాగో, శాన్ఫ్రాన్సిస్కో, శాన్జోస్,డాలస్లు ఉన్నాయని, ఈ అయిదు మెట్రో సిటీలలోనూ కలిపితే అమెరికాలోని ఇండియన్లలో 35 శాతం నివసిస్తున్నారని తేలిందని స్టడీ వివరించింది. మన వాళ్లలో ఎక్కువ మంది మేనేజ్మెంట్, బిజినెస్, సైన్స్, ఆర్ట్స్ ఆక్యుపేషన్స్ వంటి ఉద్యోగాలలో ఉంటున్నారని కూడా స్టడీ వెల్లడించింది. అంతేకాదు, మరో విశేషాన్నీ ఈ స్టడీ ప్రత్యేకంగా ప్రస్తావించింది. అమెరికాలో ఎక్కువగా హెల్త్ ఇన్సూరెన్స్ కవరేజ్ తీసుకునే వారిలోనూ మన వాళ్లే ముందుంటున్నట్లు పేర్కొంది. 2021 లో చూస్తే మన వాళ్లలో 5 శాతం మందికి మాత్రమేఇన్సూరెన్స్ లేదని తెలిపింది.