మంచు కురుస్తున్నప్పుడు, వందల కిలోమీటర్లు కార్లో ప్రయాణిస్తే.. అది అడ్వెంచర్ జర్నీ. కానీ, కేవలం సరుకులు తెచ్చుకోవడానికే రెండు రోజులు జర్నీ చేయాల్సి వస్తే! అలాంటి జర్నీనే చేసింది కెనడాకి చెందిన టిక్టాకర్. ఆమె పేరు షినీడ్ మీడర్. ఆమె న్యూట్రిషన్ కోచ్. తను చేసిన రెండు రోజుల జర్నీని సోషల్ మీడియాలో పోస్ట్ చేసింది. అది వైరల్ అవుతోంది.
కెనడాలో మంచు కొండల మధ్య ఉంటుంది యుకాన్. మారుమూలగా ఉండే ఈ గ్రామంలో ఎప్పుడూ మంచు కురుస్తూనే ఉంటుంది. షినీడ్ మీడర్ది అదే ఊరు. యుకాన్లో కిరాణా షాపులు ఉన్నాయి. కానీ, వాటిలో వంటసామాన్లు దొరకవు. అవి తెచ్చుకోవాలంటే సుమారు 550 కిలోమీటర్లు జర్నీ చేయాల్సిందే. ఆ దార్లో జర్నీ చేయడం కత్తిమీద సాములాంటిదే. ఎందుకంటే ఫోన్ సిగ్నల్స్ ఉండవు. మంచు ఎడతెరిపి లేకుండా కురుస్తూనే ఉంటుంది. వేరే వెహికల్స్ కూడా కనుచూపుమేరలో కనిపించవు. మరి అంత దూరం వెళ్లి సరుకులు, కూరగాయలు, పాలు తెచ్చుకుంటే అవి వారానికే అయిపోతాయి కదా! ఈ సమస్య లేకుండా ఉండేందుకు మీడర్ ఒక ప్లాన్ వేసుకుంది. అదేంటంటే ఫ్రోజెన్ ఐటమ్స్ తెచ్చుకోవడం.
అలా తెచ్చుకునేందుకే మీడర్ ఓ రోజు రాత్రి ఊరినుంచి బయల్దేరింది.
మంచు రోడ్లలో కారు నడుపుకుంటూ వెళ్లేసరికి రెండు రోజులు పట్టింది. స్టోర్కి వెళ్లాక 30 వేల రూపాయల విలువచేసే పప్పులను, కూరగాయలను, పాలను కొనుక్కుంది. పాలు, చపాతీలు, కూరగాయలు, పచ్చళ్లు, పండ్లు అన్నీ ఫ్రోజెన్వేనట. అవి ఆర్నెళ్ల కంటె ఎక్కువ రోజులు నిల్వ ఉంటాయని చెబుతుందామె. మీడర్ న్యూట్రిషనిస్ట్ కూడా. అందుకే కాబోలు ఈ ఫ్రోజెన్ ఫుడ్ తినడం వల్ల నష్టమేమీ ఉండదని చెబుతుందామె.
ఈ మొత్తం లైఫ్ స్టయిల్ను ‘ఐసోలేటెడ్ టౌన్’ పేరుతో యూట్యూబ్, టిక్టాకల్లో షేర్ చేసింది. మీడర్ టిక్టాక్లో, యూట్యూబ్లో పోషకాహారానికి సంబంధించిన టిప్స్ చెబుతుంటుంది. ఫాలోవర్ల ప్రశ్నలకు ఆన్సర్లు ఇస్తుంది. ఈ వీడియోను రీసెంట్గా సోషల్ మీడియాలో పోస్ట్ చేయడంతో వైరల్ అవుతోంది. ఫ్రోజెన్ ఫుడ్, అందులోని వెరైటీల గురించి ఈ వీడియో ద్వారా తెలుసుకోవచ్చు. ఫుడ్కి సంబంధించి సలహాలు ఇచ్చే ఈ కోచ్ తన పర్సనల్ లైఫ్ ఎక్స్పీరియెన్స్ చెప్పడంతో ఈ వీడియోకు క్రేజ్ పెరిగింది.