జూబ్లీహిల్స్, వెలుగు: ట్రాఫిక్ హోంగార్డ్ విఘ్నేశ్ పై దాడి కేసులో బంజారాహిల్స్ పోలీసులు దర్యాప్తు ముమ్మరం చేశారు. బుధవారం నటి సౌమ్య జానునుఅదుపులోకి తీసుకుని విచారించారు. ఉదయం11 గంటల నుంచి సాయంత్రం 5 వరకు విచారణ కొనసాగింది. అనంతరం 41ఏ సీఆర్పీసీ నోటీస్ ఇచ్చి పంపిచేశారు. ఎప్పుడు పిలిచినా విచారణకు హాజరు కావాలని పోలీసులు ఆమెను ఆదేశించారు. పోలీస్స్టేషన్ నుంచి బయటికి వచ్చిన సౌమ్య జానును విలేకర్ల ప్రశ్నలకు సమాధానం ఇస్తూ.. ‘నేను తప్పు చేశానని ఒప్పకున్నా. అయితే ఎవరిపైనా దాడి చేయలేదు. దయచేసి దాడి అనొద్దు. పోలీసులు అడిగిన ప్రశ్నలకు సమాధానం ఇచ్చా. ఆ కారు నాది కాదు. వార్తల్లో జాగ్వార్ కారు అని రాస్తున్నారు. అది మా ఫ్రెండ్ది. త్వరలోనే అన్ని విషయాలు మీడియాతో చెబుతా’ అని చెప్పి వెళ్లిపోయింది.
గత నెల 24న నటి షేక్జాన్బీ అలియాస్ సౌమ్యజాను బంజారాహిల్స్రోడ్ నంబరు 12లోని అగ్రసేన్ సర్కిల్వద్ద రాంగ్రూటులో కారు డ్రైవ్చేసింది. అక్కడ విధుల్లో ఉన్న ట్రాఫిక్ హోంగార్డ్విఘ్నేశ్ కారును ఆపాడు. రాంగ్ రూటులో ఎందుకొస్తున్నారంటూ ప్రశ్నించాడు. నన్నే ఆపుతావా అంటూ సౌమ్య వాగ్వాదానికి దిగింది. విఘ్నేశ్షర్టు పట్టుకుని లాగడంతో షర్టు చినిగింది. సెల్ఫోన్పగిలిపోయింది. విఘ్నేశ్ ఫిర్యాదుతో బంజారాహిల్స్ పోలీసులు కేసు నమోదు చేశారు. అయితే పోలీసులు అరెస్ట్ చేస్తారన్న భయంతో సౌమ్య జాను దుబాయ్ వెళ్లి పోయింది. తిరిగి వచ్చే లోపు ఆమె తరపు లాయర్పుట్టి శివశంకర్ హైకోర్టులో క్వాష్ ఫిటిషన్ వేశారు. మార్చి 11లోపు పోలీసులు పిలిస్తే విచారణకు హాజరు కావాలని నటి సౌమ్య జానుకు ఈ నెల 4న కోర్టు ఉత్తర్వులిచ్చింది. దీంతో బుధవారం ఆమె విచారణకు హాజరయ్యారు.
