- విద్యా శాఖ అధికారుల సమీక్షలో ఖమ్మం అడిషనల్ కలెక్టర్ శ్రీజ
ఖమ్మం టౌన్, వెలుగు : అధికారులు జవాబుదారీతనంతో పని చేయాలని స్థానిక సంస్థల అడిషనల్ కలెక్టర్ డాక్టర్ పి. శ్రీజ సూచించారు. గురువారం కలెక్టరేట్ లోని కాన్ఫరెన్స్ హాల్లో విద్యా శాఖపై సంబంధిత అధికారులతో నిర్వహించిన సమీక్షలో మాట్లాడారు. ప్రభుత్వ స్కూళ్లలో యూనిఫామ్స్ మొదటి జత రాని కొత్త విద్యార్థుల జాబితా, రెండవ జత రాని స్టూడెంట్స్ వివరాలు అందించాలన్నారు.
ప్రభుత్వ పాఠశాలల్లో యూనిఫామ్స్ రెండు జతలు పంపిణీ చేసినప్పటికీ ఆన్ లైన్ నమోదులో సాంకేతిక సమస్యలు వస్తున్నాయని, వీటిని గుర్తించి పరిష్కరించాలని ఆదేశించారు. టీచర్లు, స్టూడెంట్స్ పెండింగ్ ఎఫ్ఆర్ఎస్ రిజిస్ట్రేషన్ ప్రక్రియ పూర్తి చేయాలన్నారు. అవసరానికి మించి టీచర్లు ఉన్న పాఠశాల జాబితా, టీచర్ల జాబితా తయారు చేయాలని ఆదేశించారు. ఈ సమావేశంలో డీఆర్డీఓ సన్యాసయ్య, విద్యాశాఖ ప్లానింగ్ కో ఆర్డినేటర్ రామకృష్ణ, మండల విద్యాధికారులు ఉన్నారు.
