ఆదిలాబాద్, వెలుగు: ఆదిలాబాద్ జిల్లా తలమడుగు మండలం కజ్జర్ల గ్రామంలో 20 ఏళ్ల కిందట పేదలకు కేటాయించిన 142 సర్వే నంబర్ భూమిని సర్కార్ తిరిగి అన్యాయంగా లాక్కుంటోందని గ్రామస్తులు వాపోయారు. ఈ భూమిలో పార్కు ఏర్పాటుకు జరుగుతున్న ప్రయత్నాలు విరమించుకోవాలంటూ మూడు నెలల నుంచి ఆందోళన చేస్తున్నారు. ఈ క్రమంలో అక్కడ గుడిసెలు వేసుకున్నారు. గురువారం తెల్లవారుజామున పేదల గుడిసెలను తొలగించి అక్కడ ఉంటున్న పలువురు మహిళలను పోలీసులు అరెస్టు చేశారు. వారిని స్టేషన్కు తరలించారు. విషయం తెలుసుకున్న బీజేపీ డిస్ట్రిక్ట్ ప్రెసిడెంట్ పాయల్ శంకర్ ఆదిలాబాద్ రూరల్ పోలీసు స్టేషన్ కు వెళ్లి మహిళలను పరామర్శించారు.
అనంతరం మహిళలను విడిచిపెట్టగా బీజేపీ నేతలతో పాటు దళిత శక్తి ప్రోగ్రాం స్టేట్ వైస్ ప్రెసిడెంట్ అగ్గిమల్ల గణేశ్ తో కలిసి టెక్నికల్ ట్రైనింగ్ డెవలప్మెంట్ సెంటర్ (టీటీడీసీ) వద్ద కలెక్టర్ కాన్వాయ్ ముందు బైఠాయించారు. తమ భూమిలో రెవెన్యూ అధికారులు బోర్డులు పాతారని, వాటిని తొలగించాలని, మహిళలని చూడకుండా ఈడ్చుకుంటూ వెళ్లిన పోలీసులపై చర్యలు తీసుకోవాలని డిమాండ్చేశారు. అధికార పార్టీ నేతల కోసమే భూమిని స్వాధీనం చేసుకుంటున్నారని మండిపడ్డారు. భూమిలో పల్లె ప్రకృతివనం నిర్మాణం ఆపి అర్హులందరికీ పట్టాలివ్వాలని డిమాండ్ చేశారు. టీటీడీసీలో ఆందోళనకు దిగడంతో కలెక్టర్ సిక్తా పట్నాయక్వారికి సర్దిచెప్పారు. ఉన్నతాధికారులను పంపించి విచారణ చేయిస్తామని హామీ ఇచ్చారు.
