Bhuvneshwar Kumar: భారత టీ20 జట్టులోకి సీనియర్ పేసర్ భువనేశ్వర్ కుమార్ (Bhuvneshwar Kumar) రీఎంట్రీ ఇవ్వడంపై టీమిండియా మాజీ ఓపెనర్ వసీమ్ జాఫర్ (Wasim Jaffer) స్పందించారు. అక్టోబర్ 22వ తేదీ నుంచి ప్రారంభంకానున్న న్యూజిలాండ్ టూర్ కోసం భువీని ఎంపిక చేయడంపై వస్తున్న చర్చలపై ఆయన తన యూట్యూబ్ ఛానెల్ వేదికగా స్పందించారు. భువనేశ్వర్ ఎంపిక ఎవరి దయాదాక్షిణ్యాల వల్ల రాలేదని, తన అద్భుతమైన ప్రదర్శనతోనే అతను ఈ స్థానాన్ని దక్కించుకున్నాడని తేల్చి చెప్పారు.
భువీకి ఎవరి దయాదాక్షిణ్యాల వల్ల ఛాన్స్ రాలేదు:
వసీమ్ జాఫర్ మాట్లాడుతూ.. భువనేశ్వర్ కుమార్‌ను సెలెక్ట్ చేయడం ద్వారా సెలెక్టర్లు ఎవరికీ ఎలాంటి ఫేవర్ చేయలేదన్నారు. అది ఎవరి దయ కాదు.. అతను పూర్తిగా అర్హుడు.. గతంలో అతన్ని ఎందుకు పక్కనపెట్టారో నాకిప్పటికీ అర్థం కాలేదని ఆశ్చర్యం వ్యక్తం చేశారు. ఐపీఎల్‌లోనూ, రంజీల్లోనూ నిలకడగా రాణిస్తున్న భువీని యువ ఆటగాళ్ల ముసుగులో నిర్లక్ష్యం చేయడం సరికాదని అభిప్రాయపడ్డారు. ఒత్తిడి సమయాల్లో అనుభవజ్ఞులైన ఆటగాళ్ల పాత్ర ఎంతో కీలకమని, కేవలం యువ ఆటగాళ్లతోనే విజయం సాధించలేమని వసీం స్పష్టం చేశారు.
మహమ్మద్ షమీ, సిరాజ్‌లపై జాఫర్ ఆందోళన:
మరోవైపు స్టార్ పేసర్లు మహమ్మద్ షమీ, మహమ్మద్ సిరాజ్‌లకు తగినన్ని అవకాశాలు రాకపోవడంపై వసీం జాఫర్ ఆరా తీశారు. 2027 వన్డే ప్రపంచకప్ సమీపిస్తున్న తరుణంలో జట్టు కూర్పు ఎలా ఉండాలనే దానిపై ఆయన క్లారిటీ ఇచ్చారు. నా మొదటి ఎంపిక ఎప్పుడూ బుమ్రా, షమీ, సిరాజ్‌లే.. వరల్డ్ కప్ ముగిసే వరకు వీళ్లతోనే బరిలోకి దిగాలి, ఆ తర్వాతే మార్పుల గురించి ఆలోచించాలని సూచించారు. టెస్ట్ జట్టులో కూడా షమీకి కచ్చితంగా చోటు దక్కాలని, ఒకవేళ ఇక్కడ కూడా అతన్ని నిర్లక్ష్యం చేస్తే జాతీయ జట్టు తలుపులు మూసుకుపోయినట్లేనని జాఫర్ హెచ్చరించారు.
