వినైల్ నుంచి క్యాసెట్లు.. ఆ తర్వాత సీడీ, డీవీడీలు.. ఇప్పుడు స్ట్రీమింగ్.. ఇలా మనం సంగీతాన్ని వినే లేదా కొనుక్కునే పద్ధతుల్లో చాలా మార్పులు వచ్చాయి. దాంతోపాటే సంగీతాన్ని సృష్టించే ఇన్స్ట్రుమెంట్లలో కూడా మార్పులు వచ్చాయి. కానీ.. ఇప్పుడు ఏఐ వల్ల సంగీతాన్ని సృష్టించే విధానం కూడా మారిపోతోంది. ఈ మధ్య చేసిన ఒక స్టడీలో సంగీతకారులు మ్యూజిక్ కంపోజిషన్‌‌లో ఏఐని వాడుతున్నారని తేలింది. ప్రొఫెషనల్ మ్యూజిక్ ఇండస్ట్రీలో ఉన్న ప్రముఖులు కూడా ఏఐని వాడుతున్నారట.
ట్రాక్‌‌లిబ్ అనే సంస్థ చేసిన ఈ సర్వే ప్రకారం 25 శాతం మ్యూజిక్ ప్రొడ్యూసర్స్ ఇప్పుడు మ్యూజిక్ క్రియేషన్‌‌లో ఏఐని వాడుతున్నారు. అయితే వాళ్లలో ఎక్కువమంది (73.9%) దీనిని స్టెమ్ సపరేషన్ కోసం, సగం కంటే తక్కువమంది (45.5%) మాస్టరింగ్, ఈక్యూ ప్లగిన్‌‌ల కోసం ఉపయోగిస్తున్నారు. కేవలం 3 శాతం మంది మాత్రమే మొత్తం పాటను సృష్టించడానికి వాడుతున్నారు. ఈ సర్వేలో మొత్తం వెయ్యి మందికి పైగా పాల్గొన్నారు. అందులో ఎక్కువగా యూరప్కు చెందినవాళ్లే ఉన్నారు. మిగతావాళ్లు ప్రపంచంలోని వివిధ దేశాల నుంచి పాల్గొన్నారు.
