- ఏఐకేఎంఎస్ రాష్ట్ర గౌరవ అధ్యక్షుడు కోటేశ్వరరావు
భద్రాద్రికొత్తగూడెం, వెలుగు : పత్తి, వరితోపాటు ఇతర వ్యవసాయ పంటల దిగుమతులపై 50 శాతం సుంకాలు విధించే విధంగా కేంద్ర ప్రభుత్వం చర్యలు తీసుకోవాలని ఏఐకేఎంఎస్రాష్ట్ర గౌరవ అధ్యక్షుడు కోటేశ్వరరావు, న్యూడెమోక్రసీ రాష్ట్ర కార్యదర్శి వర్గ సభ్యుడు ఆవునూరి మధు అన్నారు. రైతాంగ సమస్యలు పరిష్కరించాలని డిమాండ్ చేస్తూ సోమవారం ఏఐకేఎంఎస్ ఆధ్వర్యంలో కలెక్టరేట్ ఎదుట ధర్నా నిర్వహించారు. ఈ సందర్భంగా వారు మాట్లాడుతూ పత్తి, మొక్కజొన్న, వరి ధాన్యం మొత్తాన్ని ప్రభుత్వమే కొనుగోలు చేయాలన్నారు.
కేంద్ర ప్రభుత్వం అనుసరిస్తున్న విధానాలతో రైతులు సంక్షోభంలో కూరుకుపోతున్నారని ఆందోళన వ్యక్తం చేశారు. పత్తి కొనుగోళ్లలో ఆంక్షలు విధించడం దారుణమన్నారు. విదేశీ మార్కెట్కు తలొగ్గి మోదీ ప్రభుత్వం దేశ రైతుల హక్కులను తాకట్టు పెడుతుందని మండిపడ్డారు. అనంతరం అడిషనల్ కలెక్టర్ వేణుగోపాల్ను కలిసి వినతిపత్రం అందజేశారు. కార్యక్రమంలో ఏఐకేఎంఎస్, న్యూడెమోక్రసీ నేతలు గౌని నాగేశ్వర రావు, ముక్తి సత్యం, ఏనుగు చంద్ర, ఉమర్, ప్రసాద్, రాంబాబు, మోకాళ్ల రమేశ్ పాల్గొన్నారు.
