- యాదాద్రిలో డెవలప్మెంట్ వర్క్స్ ప్రోగ్రెస్పై ఎఫెక్ట్
- జిల్లాకు సంబంధించి సెక్రటేరియట్లో 300 పైగా చెక్కులు
- మార్చి దాటితే చెక్కులన్నీ చెత్తబుట్టలోకే..
యాదాద్రి, వెలుగు: బిల్లుల పెండింగ్ కారణంగా యాదాద్రి జిల్లాలో డెవలప్మెంట్ వర్క్స్ ప్రోగ్రెస్పై ప్రభావం పడుతోంది. నెలలు గడుస్తున్నా బిల్లులు రాకపోవడంతో సర్పంచ్లు, కాంట్రాక్టర్లు ఇబ్బంది పడుతున్నారు. స్పెషల్ డెవలప్మెంట్ ఫండ్ (ఎస్డీఎఫ్) కింద పంచాయతీలు, మున్సిపాలిటీలకు పెద్ద ఎత్తున డెవలప్మెంట్ వర్క్స్ మంజూరు చేస్తున్నట్టు దత్తత గ్రామమైన వాసాలమర్రిలో సీఎం కేసీఆర్ రెండేండ్ల కింద ప్రకటించారు. యాదాద్రి జిల్లాకు 2430 వర్క్స్కు రూ. 108 కోట్ల ఫండ్స్వస్తున్నట్టు తేలింది. దీంతో జిల్లాలోని సర్పంచ్లు, బీఆర్ఎస్ లీడర్లు ఆశపడ్డారు. రూ. 5 లక్షల లోపు పనులను నామినేటెడ్గా సర్పంచ్లు, పార్టీ లీడర్లకు ఎమ్మెల్యేలు కేటాయించడంతో మరింత ఆనందంలో మునిగిపోయారు. ఈ ఆనందంలో కొందరు సర్పంచ్లు, లీడర్లు జిల్లా వ్యాప్తంగా రూ. 28 కోట్ల విలువైన 370 పనులు ప్రారంభించారు. వీటిలో సగానికిపైగా వర్క్స్ కంప్లీట్అయ్యాయి. సర్పంచ్లు, కాంట్రాక్టర్లు ఇవ్వాల్సిన వాళ్లకు కమీషన్లు ఇచ్చి బిల్లులకు సంబంధించిన చెక్కులను ఈ కుబేర్లో ఎంట్రీ చేయించారు. సెక్రటేరియట్కు వెళ్లిన చెక్కులు వెళ్లినట్టే ఆగిపోయాయి. నిధుల లేమి కారణంగా ఆరు నెలలు గడుస్తున్నా బిల్లులు రిలీజ్ కావడం లేదు. దీంతో కొత్తగా వర్క్స్ ప్రారంభించడానికి ఎవరూ ముందుకు
రావడం లేదు.
సీడీఎఫ్ వర్క్స్ దీ అదే పరిస్థితి..
నియోజకవర్గ అభివృద్ధి నిధులు (సీడీఎఫ్) కింద పనులు చేపట్టిన సర్పంచ్లు, కాంట్రాక్టర్ల బిల్లులు కూడా రావడం లేదు. ఒక్కో ఎమ్మెల్యే, ఎమ్మెల్సీ సీడీఎఫ్ కింద రూ. 3 కోట్ల డెవలప్మెంట్ వర్క్స్ చేపట్టవచ్చు. దీంతో ఆలేరు, భువనగిరి ఎమ్మెల్యేలు, ఎమ్మెల్సీ తమతమ నియోజకవర్గాల్లో కొన్ని వర్క్స్ కేటాయించారు. నకిరేకల్ నియోజకవర్గంలోని రామన్నపేట, మునుగోడు నియోజకవర్గంలోని చౌటుప్పల్, నారాయణపురం, తుంగతుర్తి నియోజకవర్గంలోని మోత్కూరు, అడ్డగూడూరు మండలాల్లో ఆయా నియోజకవర్గాల ఎమ్మెల్యేలు పనులు చేయించారు. కానీ ఈ వర్క్స్కు సంబంధించిన బిల్లుల చెక్కులు కూడా సెక్రటేరియట్లోనే ఆగిపోయాయి.
నిల్చిన రూ. 20 కోట్లు
ఎస్డీఎఫ్, సీడీఎఫ్తో పాటు కలెక్టర్ఆధీనంలోని కృషీయల్బ్యాలెన్స్ ఫండ్ (సీబీఎఫ్) చెక్కులు కలిపి 300కు పైగా సెక్రటేరియట్లో నిలిచిపోయాయి. ఈ చెక్కుల విలువ సుమారు రూ. 20 కోట్లు ఉంటుందని తెలుస్తోంది.
ఆగిన వెహికల్స్అలవెన్స్
వివిధ డిపార్ట్మెంట్స్ హెచ్వోడీల వెహికల్స్ అలవెన్స్ కూడా ఆపేసినట్లు తెలుస్తోంది. జిల్లాలో దాదాపు 60 మంది హెచ్వోడీలు, మరో 50 మంది ఇతర ఆఫీసర్లకు వెహికల్స్ అలవెన్స్ ఇస్తోంది. ఒక్కొక్కరికీ రూ. 32,340 చొప్పున అలవెన్స్ ఇవ్వాల్సి ఉంది. అయితే ఆరు నెలలుగా ఈ అలవెన్స్ను ఇవ్వడం లేదని సమాచారం. ఈ లెక్కన దాదాపు రూ. 2 కోట్ల వరకూ ఆఫీసర్లకు వెహికల్స్ అలవెన్స్ రావాల్సి ఉంది.
మార్చి 31 దాటితే అంతే..!
ఈ నెలాఖరు నాటికి బిల్స్రిలీజ్కాకుంటే చెక్కులన్నీ పనికిరావు. డెవలప్మెంట్ వర్క్స్కు సంబంధించిన బిల్లులైతే మళ్లీ మొదటి నుంచి ప్రారంభించి చెక్కులను తిరిగి ఈ కుబేర్లో ఎంట్రీ చేయాల్సి ఉంటుంది. ఆఫీసర్స్ వెహికల్స్ అలవెన్స్ మాత్రం ఇక రానట్లే. దీంతో ఆరు నెలల అలవెన్స్ తాము నష్టపోతున్నామని ఆఫీసర్లు చెబుతున్నారు.
