హైదరాబాద్, వెలుగు : సీఎం, మంత్రుల ప్రమాణ స్వీకారం రోజు ప్రదర్శించిన నిర్లక్ష్యాన్నే అధికారులు శనివారం తొలి అసెంబ్లీ సెషన్ జరుగుతున్నప్పుడూ రిపీట్ చేశారు. ట్రాఫిక్ నియంత్రణలో చేతులెత్తేయడంతో అసెంబ్లీకి వెళ్లే దారులన్నీ జామ్ అయ్యాయి. కనీసం టూ వీలర్లు కూడా కదిలే పరిస్థితి లేకపోయింది. గాంధీభవన్, కొత్త సెక్రటేరియెట్, ఖైరతాబాద్, బషీర్బాగ్ ఫ్లై ఓవర్ నుంచి అసెంబ్లీకి వెళ్లే దారులన్నీ వాహనాలతో కిక్కిరిసిపోయాయి. ఈ ట్రాఫిక్ జామ్ కారణంగానే అసెంబ్లీ సమావేశాలు పది నిమిషాలు ఆలస్యంగా ప్రారంభమయ్యాయి. ట్రాఫిక్ జామ్పై సీఎం రేవంత్రెడ్డి సీరియస్ అయినట్టు తెలిసింది. పార్టీ శ్రేణుల ద్వారా ప్రజల ఇబ్బందులను తెలుసుకున్న ఆయన.. ఇంత నిర్లక్ష్యంగా ఎందుకున్నారంటూ అధికారులను ప్రశ్నించినట్టు సమాచారం.
ఐడీలు చూడకుండానే..
సాధారణంగా అసెంబ్లీ సమావేశాల టైమ్లో లీడర్లతోపాటు అధికారులు, జర్నలిస్టులు, అనుమతి ఉన్న విజిటర్లను ఐడీ కార్డులు చెక్ చేసి లోపలికి పంపుతుంటారు. కానీ, శనివారం అసెంబ్లీ సమావేశాల సందర్భంగా ఐడీ కార్డులను చూడకుండా.. కేవలం వాహనాల పాస్లుంటే అనుమతించారు. ఇంతకుముందు అసెంబ్లీ సమావేశాలు జరిగినప్పుడు పరిస్థితి ఇందుకు భిన్నంగా ఉండేది. ఇప్పుడు నిర్లక్ష్యంగా వ్యవహరిస్తుండడంపై విమర్శలు వ్యక్తమవుతున్నాయి.
వీఐపీ మూమెంట్స్ఉన్నా..
సభలు, సమావేశాలు, అసెంబ్లీ, శోభాయాత్ర వంటివి జరుగుతున్నప్పుడు పోలీసులు కామన్గా కొన్ని ట్రాఫిక్ ఆంక్షలను పెడుతుంటారు. వీఐపీ మూమెంట్స్ ఉన్నప్పుడు కూడా వారి రాకను, వారు వచ్చే సమయాన్ని బట్టి కొన్ని చోట్ల ట్రాఫిక్ను దారి మళ్లిస్తుంటారు. అయితే, ప్రమాణ స్వీకారం రోజు గానీ, అసెంబ్లీ తొలి సెషన్ నిర్వహణ సమయంలోగానీ అధికారులు ఇవేమీ పట్టించుకోకుండా ట్రాఫిక్ నియంత్రణలో ఫెయిలయ్యారన్న విమర్శలు వ్యక్తమవుతు న్నాయి. వాస్తవానికి వీఐపీ మూమెంట్స్ఉన్నప్పుడు సామాన్యుల వాహనాలను అనుమతించరు. కానీ, ఇక్కడ వీఐపీ కాన్వాయ్లతో పాటు సామాన్యుల వెహికల్స్నూ అనుమతించారు.
ప్రమాణ స్వీకారం రోజు సోనియా, రాహుల్, రేవంత్ వెళ్తున్న కాన్వాయ్తోపాటే సామాన్యుల వాహనాలనూ వదిలేయడంతో సమస్య ఏర్పడింది. శనివారం గాంధీభవన్లో సోనియా గాంధీ జన్మదిన వేడుకల అనంతరం రేవంత్ రెడ్డి బయల్దేరేటప్పుడు అలాంటి పరిస్థితే కనిపించింది. కేసీఆర్ హయాంలో కట్టుదిట్టంగా వ్యవహరించిన అధికారులు.. ఇప్పుడెందుకు కాడి వదిలేసి నిర్లక్ష్యం ప్రదర్శిస్తున్నారన్న ప్రశ్నలు ఉత్పన్నమవుతున్నాయి.
