అలహాబాద్ : తగిన కారణం లేకుండా జీవిత భాగస్వామికి ఎక్కువ కాలం శృంగారాన్ని నిరాకరించడం మానసిక క్రూరత్వమని అలహాబాద్ హైకోర్టు వ్యాఖ్యానించింది. ఫ్యామిలీ కోర్టు తన విడాకుల పిటిషన్‌‌‌‌ను కొట్టివేయడాన్ని వ్యతిరేకిస్తూ ఓ వ్యక్తి చేసిన అప్పీల్‌‌‌‌ను గురువారం జడ్జిలు జస్టిస్ సునీత్ కుమార్, జస్టిస్ రాజేంద్ర కుమార్ లతో కూడిన బెంచ్ విచారించింది. ఫ్యామిలీ కోర్టు అనుసరించిన విధానాన్ని "హైపర్ టెక్నికల్"గా బెంచ్ పేర్కొంది. " రికార్డుల ప్రకారం.. భార్యాభర్తలిద్దరూ చాలా కాలం నుంచి విడిగా నివసిస్తున్నట్లు స్పష్టంగా తెలుస్తున్నది. భార్య వైవాహిక బంధం పట్ల గౌరవం, వైవాహిక బాధ్యతను నిరాకరించింది. దీంతో వారి వివాహం పూర్తిగా విచ్ఛిన్నమైంది" అని అభిప్రాయపడింది. ఫ్యామిలీ కోర్టు తీర్పుపై అప్పీల్ ను విచారించిన బెంచ్ ఈ మేరకు భర్తకు విడాకుల డిక్రీని మంజూరు చేస్తూ తీర్పునిచ్చింది.
