- ఎంపిక ప్రక్రియ పారదర్శకంగా ఉండాలి
- అసంపూర్తి పనులను స్పీడ్గా పూర్తి చేయాలి: మంత్రి ఉత్తమ్
హుజూర్ నగర్, వెలుగు: సూర్యాపేట జిల్లా హుజూర్నగర్ నియోజకవర్గంలోని రామస్వామి గుట్ట వద్ద నిర్మించిన హౌసింగ్ కాలనీలోని ఇండ్లను దసరా నాటికి అర్హులకు పంపిణీ చేయాలని, ఆ లోపు కాలనీలో అవసరమైన మౌలిక వసతులు కల్పించాలని మంత్రి ఉత్తమ్కుమార్ రెడ్డి ఆఫీసర్లను ఆదేశించారు.
హౌసింగ్ కార్యదర్శి వీపీ.గౌతమ్, సూర్యాపేట కలెక్టర్ తేజస్ నందలాల్ పవార్, వివిధ శాఖల ఉన్నతాధికారులతో శుక్రవారం కలెక్టరేట్ లో రివ్యూ నిర్వహించారు. ఈ సందర్భంగా మంత్రి ఉత్తమ్ కుమార్ రెడ్డి మాట్లాడుతూ మోడల్ కాలనీలో అసంపూర్తిగా మిగిలిన పనులను వెంటనే పూర్తి చేయాలని ఆదేశించారు.
లబ్ధిదారులు గృహప్రవేశాలు చేసుకునే నాటికి తాగునీరు, కరెంట్, ఇంటర్నల్రోడ్లు, డ్రైనేజీ తదితర సదుపాయాలు కల్పించాలని సూచించారు. కాలనీలోని పిల్లల కోసం కామన్ స్టడీ రూమ్స్ తో పాటు రిక్రియేషన్ సౌకర్యాలు కల్పిస్తున్నట్లు చెప్పారు. కాలనీలో స్కూలు, అంగన్ వాడీ కేంద్రం, వైద్య సదుపాయాలు, ఆట స్థలాల వంటి సౌకర్యాలకు ప్లాన్ చేయాలన్నారు.
ఈ కాలనీని రాష్ట్రంలోనే మోడల్ గా తీర్చిదిద్దుతామని చెప్పారు. అక్టోబర్ 20 దసరా రోజున లబ్ధిదారులకు ఇండ్ల కేటాయింపు పత్రాలు పంపిణీ చేయనున్నట్టు ప్రకటించారు. కేటాయింపు ప్రక్రియ పారదర్శకంగా, ఎలాంటి పొరపాట్లు లేకుండా చూడాలని ఆదేశించారు.
