రియో డ జనీరో: బ్రెస్ట్ క్యాన్సర్ ట్రీట్ మెంట్లో అమెజాన్ తేలు విషం ఉపయోగపడవచ్చని బ్రెజిల్ సైంటిస్టులు కనుగొన్నారు. ఈ విషయం తమ అధ్యయనంలో తేలిందని, సైంటిఫిక్ డెవలప్మెంట్లో ఇదొక ముందడుగని వారు తెలిపారు. యూనివర్సిటీ ఆఫ్ సావో పౌలోకు చెందిన పరిశోధకులు.. అమెజాన్ అడవుల్లో నివసించే ‘బ్రోతియస్ అమెజానికస్ స్కార్పియన్’ తేలు విషంలో ‘బామాజ్ ఎస్ సీపీఎల్ 1’ అనే మాలిక్యూల్ను కనుగొన్నారు. క్యాన్సర్ కణాలను చంపడానికి ఉపయోగించే కీమోథెరపీ డ్రగ్ లాగే ఈ మాలిక్యూల్ కూడా పనిచేస్తుందని గుర్తించారు.
‘‘మా అధ్యయనం కోసం తేలు నుంచి జన్యువులను సేకరించాం. దీనినే హెటిరోలోగస్ ఎక్స్ప్రెషన్ అంటారు. ఆ జన్యువులను మరొక ఆర్గానిజంలో ప్రవేశపెట్టి కొత్త మాలిక్యూల్స్ సృష్టిస్తాం. ఈ ప్రక్రియ ద్వారా సెరైన్ ప్రొటీస్ను సృష్టించడమే మా పరిశోధన లక్ష్యం” అని అరాంటెస్ వివరించారు. మామూలు కణజాలాలను నాశనం చేయకుండానే క్యాన్సర్ కణాలపై దాడిచేసి వాటిని నాశనంచేసే లక్షణం అమెజాన్ తేలు విషంలో ఉన్నట్లు తమ పరిశోధనలో గుర్తించామని ఆమె పేర్కొన్నారు.
