- సీపీఎం రాష్ట్ర కార్యదర్శి జాన్ వెస్లీ
హైదరాబాద్, వెలుగు: రాష్ట్ర ప్రభుత్వం జీవో నెంబర్ 252ను సవరించి అర్హులైన జర్నలిస్టులందరికీ అక్రెడిటేషన్లు ఇవ్వాలని సీపీఎం రాష్ట్ర కార్యదర్శి జాన్వెస్లీ శనివారం ఒక ప్రకటనలో డిమాండ్చేశారు. ఈ జీవో ద్వారా జర్నలిస్టులను వర్గీకరించారని, రిపోర్టర్లకు అక్రెడిటేషన్ కార్డులు, డెస్క్ జర్నలిస్టులకు మీడియా కార్డులు ఇవ్వాలని నిర్ణయించడం సరికాదని తెలిపారు.
అలాగే అక్రెడిటేషన్ కార్డుల సంఖ్య తగ్గించడంతో డెస్క్ జర్నలిస్టులతోపాటు చిన్న, మధ్యతరహా పత్రికల్లో పనిచేస్తున్న వేలాది మంది వర్కింగ్ జర్నలిస్టులు నష్టపోతారని ఆవేదన వ్యక్తం చేశారు. రాష్ట్రంలో జర్నలిస్టులకు కనీస భద్రత, సంక్షేమం అందడం లేదని జాన్వెస్లీ ఆందోళన వ్యక్తం చేశారు. ఆరోగ్య బీమా అమలు కావడంలేదని, హెల్త్ కార్డులపై కార్పొరేట్ ఆసుపత్రుల్లో నగదు రహిత చికిత్స అందడం లేదని చెప్పారు.
