- వర్షాల కారణంగా బ్రేక్.. అమిత్షా, ప్రియాంక సభలు వాయిదా
- వర్షాల కారణంగా బ్రేక్ ప్రకటించిన నేతలు
- ప్రియాంక సభ వచ్చే నెల 5 లేదా 7న నిర్వహించే చాన్స్
హైదరాబాద్, వెలుగు: రాష్ట్రంలో భారీ వర్షాలు పడుతుండటంతో ఈ నెల 29న హైదరాబాద్కు రావాల్సిన కేంద్ర హోం మంత్రి అమిత్షా టూర్ రద్దయింది. అలాగే, ఈ నెల 30న కొల్లాపూర్లో జరగాల్సిన కాంగ్రెస్ జనరల్ సెక్రటరీ ప్రియాంకా గాంధీ సభ కూడా వాయిదా పడింది. ఈ నెల 29 న ఖమ్మంలో భారీ బహిరంగ సభలో అమిత్ షా పాల్గొనాల్సి ఉంది.
వర్షాల కారణంగా దాన్ని రద్దు చేసి, బదులుగా హైదరాబాద్లో వివిధ సామాజిక వర్గాల మేధావులు, కళాకారులు, కవులు, ఉద్యమకారులతో షా సమావేశాన్ని రాష్ట్ర బీజేపీ ప్లాన్ చేసింది. ఈ సభ కోసం ఏర్పాట్లు జరుగుతుండగా.. రాష్ట్రంలో వర్షాలు పెరగడంతో దీనిని కూడా రద్దు చేస్తున్నట్లు నేతలు గురువారం ప్రకటించారు. వాస్తవానికి మొదట ఖమ్మం సభ గత నెల 15 న నిర్వహించాలని ప్లాన్ చేయగా.. అప్పుడు గుజరాత్ లో తుఫాన్ కారణంగా ఈ నెల 29 కి వాయిదా వేశారు. వర్షాల కారణంగా అటు ఖమ్మంలో సభ జరగక, ఇటు హైదరాబాద్లనూ సాధ్యంకాక అమిత్షా టూర్ మూడుసార్లు వాయిదా పడింది.
ALSO READ :గురుకుల స్కూల్లో .. గుండెపోటుతో ఇంటర్ స్టూడెంట్ మృతి
హైకమాండ్ నిర్ణయాన్ని బట్టి కొల్లాపూర్లో సభ
ఈ నెల 30న కొల్లాపూర్లో ప్రియాంక సభ పెట్టాలని కాంగ్రెస్ ప్లాన్ చేసింది. ఈ సభలోనే బీఆర్ఎస్ మాజీ మంత్రి జూపల్లి కృష్ణా రావు కాంగ్రెస్లో చేరాల్సి ఉంది. రాష్ట్రంలో భారీ వర్షాలు పడుతుండటంతో తప్పని పరిస్థితుల్లో రాష్ట్ర పార్టీ నేతలు సభను వాయిదా వేశారు. ప్రియాంక భద్రతా సిబ్బంది, వ్యక్తిగత సిబ్బంది ఇప్పటికే కొల్లాపూర్కు వచ్చి పరిస్థితిని సమీక్షించారని పార్టీ నేతలు చెప్తున్నారు. వర్షాల గురించి వారు ప్రియాంకకు సమాచారం ఇవ్వడంతో సభను వాయిదా వేయాల్సిందిగా ఆమె సూచించారని టీపీసీసీ వైస్ ప్రెసిడెంట్ మల్లు రవి చెప్పారు.
సభ నిర్వహించేందుకు ఆగస్టు 5 లేదా ఆగస్టు 7వ తేదీలను రాష్ట్ర కాంగ్రెస్ నేతలు హైకమాండ్కు సూచించారని నేతలు చెప్తున్నారు. పార్టీ పెద్దల నిర్ణయాన్ని బట్టి ఏదోఒక తేదీలో నిర్వహించనున్నట్లు తెలిపారు. వాస్తవానికి ఈ నెల 20నే కొల్లాపూర్లో సభ నిర్వహించాల్సి ఉన్నా.. వర్షాల కారణంగానే 30వ తేదీకి వాయిదా వేశారు. అదే కారణంతో మరోసారి వాయిదా వేశారు.
