హైదరాబాద్, వెలుగు: తెలంగాణలో చేస్తున్న పోరాటాలతో బీజేపీ ప్రత్యామ్నాయ శక్తిగా ఎదుగుతోందని, రాష్ట్రంలో అధికారంలోకి వచ్చే అవకాశాలున్నాయని కేంద్ర హోం మంత్రి అమిత్ షా అన్నారు. టీఆర్ఎస్ ప్రభుత్వంపై పోరాటాలను మరింత ఉధృతం చేయాలని బీజేపీ రాష్ట్ర అధ్యక్షుడు, ఎంపీ బండి సంజయ్కు సూచించారు. మంగళవారం ఢిల్లీలో అమిత్ షాతో బండి సంజయ్ భేటీ అయ్యారు. తెలంగాణలో రాజకీయ పరిస్థితులను, కేంద్రాన్ని బద్నాం చేసేందుకు టీఆర్ఎస్ సర్కారు ఆడుతున్న డ్రామాలను సంజయ్ ఆయనకు వివరించారు. తెలంగాణలో టీఆర్ఎస్ ప్రభుత్వంపై ప్రజల్లో వ్యతిరేకత నెలకొందని, ఈ సమయంలో బీజేపీ రాష్ట్ర శాఖ చేపడుతున్న కార్యక్రమాలు సక్సెస్ అవుతున్నాయని షా అభినందించారు. టీఆర్ఎస్ ప్రజా వ్యతిరేక విధానాలపై మరింతగా పోరాడాలని సూచించారు. ప్రజా సంగ్రామ యాత్రపై కూడా చర్చించారు. ఏప్రిల్ 14 నుంచి రెండో విడత ప్రజా సంగ్రామ యాత్ర చేపడుతున్న నేపథ్యంలో రాష్ట్రానికి రావాలని అమిత్ షాను సంజయ్ ఆహ్వానించారు. సానుకూలంగా స్పందించిన ఆయన.. యాత్ర షెడ్యూల్ అడిగి తెలుసుకున్నారు. పాదయాత్ర ముగింపు సభ హైదరాబాద్ శివారులోని మహేశ్వరం నియోజకవర్గంలో ప్లాన్ చేస్తున్నామని సంజయ్ చెప్పడంతో.. ఆ రోజు తప్పకుండా రాష్ట్రానికి వస్తానని హామీ ఇచ్చారు. టీఆర్ఎస్ పాలనలో ప్రజలు పడుతున్న బాధలను తెలుసుకునేందుకు పాదయాత్ర చేపట్టడం మంచి పరిణామమని సంజయ్ను అభినందించారు.
జేపీ నడ్డాతోనూ సమావేశం
ప్రజా సంగ్రామ యాత్ర, రాష్ట్రంలో రాజకీయ పరిస్థితులు, భవిష్యత్ కార్యాచరణపై బీజేపీ నేషనల్ ప్రెసిడెంట్ జేపీ నడ్డాతో సంజయ్ చర్చించారు. టీఆర్ఎస్ ప్రభుత్వంపై బీజేపీ చేస్తున్న ఉద్యమాల పట్ల నడ్డా సంతృప్తి వ్యక్తం చేశారు. వీలు చూసుకుని పాదయాత్రకు హాజరవుతానని చెప్పారు. ‘మీ పోరాటం భేష్.. ఇలాగే కొనసాగించండి.. మీ వెంట మేమున్నాం’ అంటూ సంజయ్కు నడ్డా భరోసా ఇచ్చారు.
