సంగమేశ్వరం డీపీఆర్లో అన్నీ తప్పులే

సంగమేశ్వరం డీపీఆర్లో తప్పులు

ఏపీ పంపిన రిపోర్ట్లో వివరాలేవీ లేవన్న కేంద్రం

పూర్తి ఇన్ఫర్మేషన్తో మళ్లీ పంపాలని లెటర్

హైదరాబాద్‌, వెలుగు: డీటైల్డ్‌ ప్రాజెక్టు రిపోర్టు (డీపీఆర్‌) సరిగా రాయడం నేర్చుకోవాలని ఏపీ సర్కారుకు కేంద్రం చురకలు వేసింది. ప్రాజెక్టుల డీపీఆర్‌ తయారీపై సెంట్రల్ వాటర్ కమిషన్(సీడబ్ల్యూసీ) వెబ్‌సైట్లోని గైడ్‌ లైన్స్‌ ను ఫాలో కావాలని సూచించింది. సంగమేశ్వరం (రాయలసీమ) లిఫ్ట్‌ స్కీం డీపీఆర్‌ సరిగా లేదని, అన్ని వివరాలతో సమగ్ర డీపీఆర్‌ను మళ్లీ సమర్పించాలని ఆదేశిస్తూ లెటర్ రాసింది. కేంద్ర జలశక్తి శాఖ డైరెక్టర్‌ ఎన్‌.ముఖర్జీ గురువారం ఏపీ వాటర్‌ రీసోర్సెస్‌ ఈఎన్సీకి ఈ లెటర్ పంపారు. రాయలసీమ లిఫ్ట్‌‌ స్కీం ద్వారా సంగమేశ్వరం నుంచి రోజుకు 3 టీఎంసీలను ఎత్తిపోసి.. శ్రీశైలం రైట్‌‌ మెయిన్‌‌ కెనాల్‌‌, పోతిరెడ్డిపాడు హెడ్‌‌ రెగ్యులేటర్‌‌ పరిధిలోని ఆయకట్టుకు అందించే ప్రాజెక్టు డీపీఆర్‌‌ తమకు అందిందని కేంద్ర జలశక్తి శాఖ డైరెక్టర్ తన లెటర్లో పేర్కొన్నారు. ప్రాజెక్టు అప్రైజల్‌‌ మేనేజ్‌‌మెంట్‌‌ సిస్టం (ఇ-పీఏఎంఎస్‌‌) ద్వారా సాఫ్ట్‌‌కాపీ అందిందని, డీపీఆర్‌‌ హార్డ్‌‌ కాపీ ఈ నెల 3న తమకు చేరిందని వివరించారు. అయితే డీపీఆర్‌‌లో ఉండాల్సిన సాధారణ సమాచారమేదీ కూడా ఆ రిపోర్టులో లేదని స్పష్టం చేశారు. హైడ్రాలజీ, ఇంటర్‌‌ స్టేట్‌‌, ఇరిగేషన్‌‌ ప్లానింగ్‌‌, డిజైన్‌‌, కాస్ట్‌‌ ఎస్టిమేట్‌‌ తదితర అంశాలేవి వివరించలేదని.. ప్రాజెక్టుకు టెక్నికల్‌‌ అప్రైజల్‌‌ ఇవ్వడానికి ఈ రిపోర్టును పరిగణనలోకి తీసుకోలేమని స్పష్టం చేశారు.

ముందు గైడ్లైన్స్ చూడండి

ఇరిగేషన్‌‌, మల్టీపర్పస్‌‌ ప్రాజెక్టుల డీపీఆర్‌‌లను రూపొందించడానికి సీడబ్ల్యూసీ నిర్దేశిత గైడ్‌‌లైన్స్‌‌ రూపొందించిందని జలశక్తి శాఖ డైరెక్టర్ వివరించారు. సీడబ్ల్యూసీ వెబ్‌‌సైట్లో ఆ వివరాలు ఉన్నాయని.. వాటి ఆధారంగా సమగ్ర డీపీఆర్‌‌ను తయారు చేయాలని సూచించారు. ఆ వెబ్‌‌సైట్లోని పబ్లికేషన్‌‌ విభాగంలో ఉన్న ఐటం 29తో వివరాలన్నీ సరిచూసుకుని.. పూర్తిస్థాయి డీపీఆర్ను తమకు పంపాలని ఆదేశించారు.

ఏపీ సీఎం జగన్‌‌ కోరినా..?

ఏపీ సీఎం జగన్‌‌ బుధవారం కేంద్ర జలశక్తి మంత్రి గజేంద్రసింగ్‌‌ షెకావత్‌‌ను కలిసి రాయలసీమ లిఫ్ట్స్కీం డీపీఆర్‌‌ను పరిశీలించి, ఆమోదించాలని కోరారు. అయితే జగన్‌‌ కేంద్ర మంత్రిని కలిసి వెళ్లిన కొద్దిసేపటికే.. ప్రాజెక్టు డీపీఆర్‌‌ సరిగా లేదంటూ జలశక్తి శాఖ డైరెక్టర్ ఏపీకి లెటర్ రాశారు. ప్రాజెక్టులకు టెక్నికల్‌‌ అప్రైజల్‌‌ ఇవ్వడానికి అవసరమైన ప్రొటోకాల్‌‌ అనుసరించాల్సిందేనని.. దానికి రాజకీయ నిర్ణయాలతో సంబంధం లేదని కేంద్రమంత్రి క్లారిటీ ఇవ్వడంతోనే.. డైరెక్టర్‌‌ ఏపీకి లెటర్ రాసినట్టు తెలిసింది. సీఎం కేసీఆర్‌‌ ఇటీవల కేంద్రమంత్రిని కలిసిన రోజే.. రాష్ట్ర ప్రాజెక్టులకు అనుమతులు, కృష్ణా, గోదావరి ట్రిబ్యునళ్ల విషయంలో చేపట్టాల్సిన చర్యలపై రాష్ట్రానికి లెటర్ రాశారు. ఏపీ విషయంలోనూ అదే రీతిలో స్పందించారు.

For More News..