విజయవాడ: ఇంద్రకీలాద్రి శ్రీ దుర్గామల్లేశ్వర స్వామి వార్ల దేవస్థానంలో ఆషాఢ మాస ఉత్సవాల సందర్భంగా ఈనెల 15 నుంచి ప్రారంభం కానున్న అమ్మవారి 'సారె సమర్పణ' మహోత్సవాలకు దేవస్థానం సర్వసిద్ధమైంది. ఈ నేపథ్యంలో భక్తులకు కల్పిస్తున్న సౌకర్యాలు, క్యూ లైన్ల నిర్వహణను ఆలయ ఈవో వి.కె. శీనా నాయక్, ధర్మకర్తల మండలి సభ్యులు, ఆలయ అధికారులతో కలిసి సోమవారం (జులై 13) క్షేత్రస్థాయిలో విస్తృతంగా పరిశీలించారు.
ఈ సందర్భంగా ఈవో శీనా నాయక్ మాట్లాడుతూ.. ఆషాఢ సారె సమర్పణకు విచ్చేసే భక్తుల రద్దీని దృష్టిలో ఉంచుకుని ఈ ఏడాది ప్రత్యేక, పక్కా ప్రణాళికలతో ఏర్పాట్లు చేస్తున్నట్లు తెలిపారు. భక్తుల సౌకర్యార్థం ఈసారి శ్రీ కనకదుర్గ నగర్లోనే క్లోక్ రూమ్, ఉచిత పాదరక్షల స్టాండ్ (చెప్పుల స్టాండ్), మొబైల్ ఫోన్లు భద్రపరుచుకునే పాయింట్లను ఏర్పాటు చేస్తున్నట్లు వెల్లడించారు.
సారె సమర్పణ, దర్శన ప్రణాళిక ఇలా:
సారె సమర్పించే భక్తుల బృందాలు మొదట శ్రీ కనకదుర్గ నగర్లో తమ పేర్లను తప్పనిసరిగా రిజిస్ట్రేషన్ చేయించుకోవాలి. అక్కడ రిజిస్ట్రేషన్ పూర్తి చేసుకుని, నమోదు ఫారం (స్లిప్) తీసుకున్న అనంతరం క్యూ మార్గం ద్వారా మహామండపం ర్యాంప్ మీదుగా 7వ అంతస్తులోకి ప్రవేశిస్తారు. అక్కడి నుండి భక్తులను శ్రీ భవాని అనుగ్రహ దర్శన్ (రూ. 100/-) క్యూ లైన్ ద్వారా అమ్మవారి దర్శనానికి అనుమతిస్తారు.
►ALSO READ | టీటీడీకి ఆర్ఎస్ బ్రదర్స్ రూ.4.41 కోట్ల భారీ విరాళం
దర్శనానంతరం భక్తులు మహామండపం 6వ అంతస్తులో తాము తెచ్చిన సారెను సమర్పించి, అక్కడ ఆ రిజిస్ట్రేషన్ స్లిప్ చూపించి ఆలయ మర్యాదలతో ఆశీర్వచనం అందుకుంటారు. అనంతరం 2వ అంతస్తులో అన్నప్రసాదం స్వీకరించి క్రిందికి వెళ్లేలా సర్వాంగ సుందరంగా ఏర్పాట్లు చేశామన్నారు.
