అయోధ్యలో శ్రీరామ మందిర ప్రారంభోత్సవానికి, బాల రామయ్య విగ్రహ ప్రతిష్ఠాపనకు కౌంట్‌డౌన్‌ మొదలైంది. ఇప్పటికే దేశ వ్యాప్తంగా పండుగ వాతావరణం నెలకొంది. ఈ చారిత్రాత్మక క్షణాన్ని చూసేందుకు కోట్లాది మంది రామ భక్తులు ఆసక్తిగా ఎదురుచూస్తున్నారు. అంతేకాదు రామ భక్తులు తమ భక్తిని రకరకాలుగా ప్రదర్శిస్తున్నారు. కొంతమంది రామభక్తులు తమ ఊర్ల నుంచి కాలినడకన శ్రీరాముని దర్శనానికి బయలుదేరారు. ఓ రామ భక్తుడు రామమందిర కాన్సెప్ట్‌లో డైమండ్ నెక్లెస్ తయారు చేసి వార్తల్లో నిలిచాడు. కొంతమంది కళాకారులు తమ ప్రతిభను ప్రదర్శిస్తూ.. రామ మందిరాన్ని ముగ్గుగా వేసి ఆకట్టుకుంటే.. తాజాగా ఓ యువకుడు బిస్కట్స్ తో రామ మందిర ప్రతి రూపాన్ని సృష్టించాడు.
జనవరి 22 న జరగబోయే అయోధ్య రామ మందిర ప్రారంభోత్సవం కోసం యావత్ భారతదేశం ఎదురుచూస్తోంది. పశ్చిమ బెంగాల్ దుర్గాపూర్‌కి చెందిన ఓ యువకుడు 20 కేజీల బిస్కెట్స్ ఉపయోగించి అయోధ్య రామ మందిర ప్రతిరూపాన్ని తయారు చేసారు. ఈ బిస్కెట్స్‌తో తయారు చేసిన రామ మందిరం సోషల్ మీడియాలో వైరల్ అవుతోంది.
వెస్ట్ బెంగాల్‌కి చెందిన చోటన్ ఘోష్ అనే ఆర్టిస్ట్ 20 కేజీల పార్లే జీ బిస్కెట్స్ ఉపయోగించి అయోధ్య రామ మందిర ప్రతిరూపాన్ని తయారు చేసారు. ఈ వీడియోలో ఆ వ్యక్తి అద్భుతమైన ప్రతిభను చూడవచ్చు. అతను స్నేహితుల సహాయంతో 4×4 అడుగుల రామాలయం ప్రతిరూపాన్ని తయారు చేశాడు. దానిని తయారు చేయడానికి అతనికి ఐదు రోజులు పట్టింది. ఈ మోడల్ తయారీలో బిస్కెట్లు కాకుండా థర్మాకోల్, ప్లైవుడ్, గ్లూ-గన్ మొదలైన వాటిని ఉపయోగించారు. ఈ ప్రతిరూపాన్ని చూసిన తర్వాత ఆ వ్యక్తి రామ మందిరానికి సంబంధించిన ఖచ్చితమైన కాపీని తయారు చేసినందున అందరూ ఆశ్చర్యపోయారు.
ఈ వీడియో durgapur_times అనే Instagram పేజీలో భాగస్వామ్యం చేయబడింది. ఆలయ ప్రతిరూపాన్ని తయారు చేయడానికి 20 కిలోల పార్లే-జి బిస్కెట్లను ఉపయోగించినట్లు వినియోగదారు క్యాప్షన్‌లో తెలిపారు. ఈ వీడియోను ఇప్పటివరకు దాదాపు రెండు కోట్ల మంది వీక్షించగా, 26 లక్షల మందికి పైగా వినియోగదారులు దీన్ని లైక్ చేశారు. వీడియో చూసిన తర్వాత ఒక వినియోగదారు మీ కళకు వందనం కానీ ఇలా ఆహారాన్ని వృధా చేయకండి అని రాశారు. మీరు చాలా మంచి పని చేసారు కానీ ఇలా ఆహారాన్ని వృధా చేయకండి అని మరొక వినియోగదారు రాశారు. వావ్, మన దేశంలో ప్రతిభకు కొరత లేదని మరొక వినియోగదారు కామెంట్ చేశారు.
