- అత్యధికంగా నిర్మల్ జిల్లాలో 43.1 డిగ్రీలు
- 13 జిల్లాల్లో 42 డిగ్రీలకుపైగానే టెంపరేచర్లు
- 21 జిల్లాలకు ఆరెంజ్ అలర్ట్ జారీ
హైదరాబాద్, వెలుగు: రాష్ట్రంలో ఎండలు దంచి కొడుతున్నాయి. ఈ సీజన్ లో తొలిసారిగా అన్ని జిల్లాల్లోనూ టెంపరేచర్లు 40 డిగ్రీలకు పైగా నమోదయ్యాయి. గురువారం అత్యధికంగా నిర్మల్ జిల్లాలో 43.1 డిగ్రీల గరిష్ట ఉష్ణోగ్రత నమోదైంది. ఒక జిల్లాలో 43 డిగ్రీలు, 13 జిల్లాల్లో 42, 12 జిల్లాల్లో 41, 7 జిల్లాల్లో 40 డిగ్రీలకు పైగా టెంపరేచర్లు నమోదయ్యాయి. అన్ని జిల్లాల్లోనూ గరిష్ట ఉష్ణోగ్రతలు 40 డిగ్రీల మార్క్ను దాటేశాయి. మరో నాలుగు రోజుల పాటు ఎండల తీవ్రత అధికంగా ఉంటుందని వాతావరణ శాఖ హెచ్చరించింది. మరో మూడు డిగ్రీల వరకు టెంపరేచర్లు పెరిగే ప్రమాదముందని పేర్కొంది. శనివారం 21 జిల్లాలకు ఆరెంజ్ అలర్ట్ జారీ చేసింది. ఈ నేపథ్యంలోనే ఈ నెలాఖరు నాటికే టెంపరేచర్లు 45 డిగ్రీల మార్క్ను అందుకోవచ్చని ఆందోళనలు వ్యక్తమవుతున్నాయి.
42కిపైగా టెంపరేచర్లు నమోదైన జిల్లాలివే
నిర్మల్ జిల్లాలోని దస్తూరాబాద్లో అత్యధికంగా 43.1 డిగ్రీల టెంపరేచర్ నమోదైంది. ఆ తర్వాత భద్రాద్రి కొత్తగూడెం జిల్లా సుజాతా నగర్లో 42.9, కుమ్రంభీం ఆసిఫాబాద్లో 42.5, నల్గొండ జిల్లాలో 42.4, ఆదిలాబాద్, మహబూబ్నగర్లో 42.3 చొప్పున, వనపర్తిలో 42.2, మంచిర్యాల, సూర్యాపేట, జగిత్యాల, మేడ్చల్ మల్కాజిగిరి జిల్లాల్లో 42.1 చొప్పున, నిజామాబాద్, రాజన్న సిరిసిల్ల, జోగుళాంబ గద్వాలలో 42 డిగ్రీల చొప్పున ఉష్ణోగ్రతలు నమోదయ్యాయి. ఇక కామారెడ్డి, సిద్దిపేట జిల్లాల్లో 41.9 డిగ్రీల ఉష్ణోగ్రత నమోదైంది. నాగర్కర్నూల్, యాదాద్రిలో 41.8, ములుగు, ఖమ్మం, హైదరాబాద్, రంగారెడ్డి జిల్లాల్లో 41.7, కరీంనగర్లో 41.4, మెదక్లో 41.3, హనుమకొండలో 41.2, మహబూబాబాద్లలో 41.1 డిగ్రీల ఉష్ణోగ్రతలు నమోదయ్యాయి. అలాగే సంగారెడ్డి జిల్లాలో 40.6 డిగ్రీలు, వికారాబాద్లో 40.5, జనగామలో 40.4, పెద్దపల్లి, జయశంకర్ భూపాలపల్లి, నారాయణపేటలో 40.3 చొప్పున, వరంగల్ జిల్లాలో 40 డిగ్రీల టెంపరేచర్లు నమోదయ్యాయి.
