వేములవాడరూరల్, వెలుగు : మాల్దీవ్స్ విషయంలో భారతీయులు తీసుకున్న చొరవ.. హిందూ ధర్మ, దేశ రక్షణ, దేశ ఐక్యతలో ఇదే పంథాను కొనసాగించాలని బీజేపీ జాతీయ ప్రధాన కార్యదర్శి, ఎంపీ బండి సంజయ్ కుమార్ పిలుపునిచ్చారు. వేములవాడ రూరల్ మండలం వెంకటాంపల్లి గ్రామంలో సోమవారం వికసిత్ భారత్ సంకల్ప యాత్రలో ఎంపీ పాల్గొని కేంద్ర ప్రభుత్వం అందించే పథకాలను వివరించారు. ఈ సందర్భంగా ఆయన మాట్లాడుతూ కేంద్ర ప్రభుత్వం ప్రజల కోసం అనేక సంక్షేమ పథకాలను ప్రవేశపెట్టిందని, పథకాలను, సబ్సిడీలను ప్రజలు సద్వినియోగం చేసుకోవాలన్నారు.
రైతులు సంఘంగా ఏర్పడితే సబ్సిడీ రుణాలు పొందవచ్చన్నారు. అధికారంలోకి వచ్చిన 100 రోజుల్లోనే 6 గ్యారంటీలను అమలు చేస్తామని కాంగ్రెస్హామీ ఇచ్చిందని, గత ప్రభుత్వం ప్రజలపై అప్పుభారం మోపారని, కొత్త హామీలను ఎలా తీరుస్తారో ప్రజలకు చెప్పాల్సిన బాధ్యత కాంగ్రెస్ ప్రభుత్వానిదేనన్నారు. ప్రభుత్వ బడుల్లో స్కావెంజర్లు లేక అవస్థలు పడుతున్నారని ఆవేదన వ్యక్తం చేశారు.
హైస్కూల్కు చెందిన స్టూడెంట్అనూష మనమంతా ఒకటే... కొలిచే దేవతలెందరున్నా తల్లి భారతి ఒక్కటే నంటూ స్టేజీపై పాట పాడగా ఎంపీ ఆమెను అభినందించారు. కార్యక్రమంలో పార్టీ జిల్లా అధ్యక్షుడు ప్రతాప రామకృష్ణ, లీడర్లు డా.చెన్నమనేని వికాస్రావు, తిరుపతి, మల్లిఖార్జున్, సర్పంచ్ చంద్రయ్య పాల్గొన్నారు.
