- బీసీ కమిషన్ చైర్మన్ నిరంజన్
హైదరాబాద్, వెలుగు: పంచాయతీ ఎన్నికల రిజర్వేషన్లలో లోపాలు ఉన్నాయని వాటిని సరిదిద్దాలని బీసీ కమిషన్ చైర్మన్ గోపిశెట్టి నిరంజన్ కోరారు. ఈ అంశంపై రాష్ర్ట ప్రభుత్వం ఉన్నతస్థాయి కమిటీని ఏర్పాటు చేయాలని శనివారం పత్రిక ప్రకటనలో సూచించారు.
రిజర్వేషన్లలో లోపాలు సవరించిన తరువాతే ఎన్నికలు నిర్వహించాలని తెలిపారు. ఈ రిజర్వేషన్లతో ఎన్నికలు జరిపితే బీసీలకు తీవ్ర నష్టం జరుగుతుందని నిరంజన్ పేర్కొన్నారు.2019 పంచాయతీ ఎన్నికల్లో బీసీలకు 22.78 శాతం రిజర్వేషన్లు కల్పిస్తే ఇప్పుడది 21.39 శాతానికి తగ్గిందని ఆయన గుర్తు చేశారు.
బీసీల సంఖ్య జనాభాలో 56.33 శాతం అని ఇటీవల జరిగిన ఇంటింటి సర్వేలో తేలిన తర్వాత రిజర్వేషన్ల శాతం గతంలో కంటే తగ్గడంపై బీసీలు ఆందోళన చెందుతున్నారని ఆయన పేర్కొన్నారు. రిజర్వేషన్లను నిర్ధారించే ప్రక్రియలో జరిగిన పొరపాటు వల్లనే బీసీ రిజర్వేషన్లు గతంలో కంటే తక్కువ అయ్యాయని వెల్లడించారు.
