బషీర్బాగ్, వెలుగు: బీటెక్ విద్యార్థి అంకం రాహుల్ మృతిపై సమగ్ర విచారణ జరిపి, వాస్తవాలను వెలికితీయాలని, బాధ్యులపై కఠిన చర్యలు తీసుకోవాలని బీసీ రాజ్యాధికార సమితి వ్యవస్థాపక అధ్యక్షుడు దాసు సురేశ్డిమాండ్ చేశారు. బుధవారం బషీర్ బాగ్ ప్రెస్ క్లబ్ లో ఏర్పాటు చేసిన సమావేశంలో ఆయన మాట్లాడారు. రాహుల్ది హత్యో, ఆత్మహత్యో ప్రజలకు వెల్లడించాల్సిన బాధ్యత పోలీసులపై ఉందన్నారు.
ఇప్పటికీ మృతదేహాన్ని తల్లిదండ్రులకు అప్పగించకపోవడానికి గల కారణాలను కూడా చెప్పాలని కోరారు. హైదరాబాద్ ఇన్చార్జి మంత్రి పొన్నం ప్రభాకర్నైతిక బాధ్యత వహించాలని, ఏపీ డిప్యూటీ సీఎం పవన్ కల్యాణ్ ఈ అంశంపై స్పందించి, విచారణ వేగవంతమయ్యేలా చర్యలు తీసుకోవాలన్నారు.
బాధిత కుటుంబానికి కళాశాల యాజమాన్యం రూ.కోటి, తెలంగాణ, ఆంధ్రప్రదేశ్ రాష్ట్ర ప్రభుత్వాలు రూ.కోటి పరిహారం చెల్లించాలని కోరారు. నాయకులు పోశాల సరస్వతి, మాకాని నాగజ్యోతి , చిక్క దేవదాస్ , మంద వెంకటస్వామి , మంద ఈశ్వర్, శేఖర్ తదితరులు పాల్గొన్నారు.
